SHËNIM: Policët dhe votat në optikën e PD-së

Dy ngjarje të shkëputura të ditëve të fundit, njëra në lidhje me një reagim policor në Kukës dhe tjetra mbi një fjalim “porosish” të kreut të PS-së Edi Rama për strukturat lokale partiake në prag të zgjedhjeve lokale, sollën një reagim të furishëm të Partisë Demokratike. Në fillim le të përmendim shkurtimisht incidentet në fjalë. Shefi i krimeve në Kukës, gjatë zhvillimit të një proteste të rinjsh në rrugën e Kombit, një moment acarimi nxori pistoletën e shërbimit dhe bëri aktin e mbushjes për të larguar protestuesit e mbledhur pranë tij. PD foli për një dhunë të paparë policore mbi demonstruesit paqësorë, që tek e fundit kërkonin faljen e kamatës së energjisë së papaguar në vite.

Në një mbledhje me strukturat socialiste në Shkodër, kryeministri Rama porosit eksponentët lokalë të punojnë sa më fort për rezultate pozitive në zgjedhje, dhe përmend termin “drejtorët të marrin përgjegjësi sesa kuti do sjellin…” apo diçka e ngjashme. Tani, për rastin e parë ministri i brendshëm vendosi dje pezullimin e oficerit deri në hetimin e plotë të ngjarjes, ndërsa në rastin e dytë, selia rozë sqaroi përmes një njoftimi për shtyp, se ishte fjala për “drejtorët operacionalë”, një strukturë e vendosur së fundi për menaxhimin e zgjedhjeve. A ishte ky një “ndreqje nga halli” e një porosie në fakt makiavelike, ku drejtorë prej vërteti të administratës duhet të përgjigjen direkt sesa kuti me vota do sjellin për PS-në? Këtë nuk e dimë, por padyshim që kur një porosi me terma të tillë regjistrohet (ndoshta nga ndonjë socialist i ndershëm) dhe i çohet Berishës, pjesa tjetër e filmit është e qartë: Po vidhen zgjedhjet, ja porositë e hapëta për grabitje votash etj.

Opozita bën punën më të mirë që reagon për ngjarje të tilla, të vërteta apo të sajuara. Një shef policie që mbush demonstrativisht pistoletën në fytyrë të disa protestuesve, qofshin këta dhe djem të nervozuar; një pistoletë që nuk duhej ta kishte fare me vete, meriton reagim të fortë nga të gjithë. Ashtu si një kryetar partie që fut në një togfjalësh ‘drejtorët dhe votat’, duhet patjetër të japë sqarime. Por siç shkruanin disa lexues të DITA-s: Kush flet për dhunën e policisë; kush ulëret për grabitje votash?

Në të dyja rastet është Berisha dhe PD-ja. Që kanë dëshmuar në mënyrë të përsëritur dhe me fakte të shumta, se në rastin e parë, të njëjtin oficer do ta kishin katapultuar në karrierë. Aq më mirë pastaj nëse do vritej dikush apo disa… ndërsa për administratën politike dhe angazhimin saj në fushatë dhe në zgjedhje nga ana e PD-së, nuk do të mjaftonte kjo faqe, dhe as ky numër i gazetës për të shkruar. Është ende i freskët formulari “tip” që strukturat e PD-së në Fier kërkonin për çdo punonjës të administratës dhe mësuesit etj, ku kishte një rubrikë të bindjeve politike. Nuk ka sesi harrohen kalamajtë e shkollave që mbushnin sheshet e mitingjeve të PD-së, dhe ditët e pushimit që bënin shkolla të ndryshme kur ‘vizitoheshin’ nga eksponentët e lartë të pushtetit të djathtë. Le pastaj kuponat e pafundme të karburantit të ushtrisë që mbushnin çdo makinë të PD-së në prag fushate.

Ndërkaq, nuk besoj se ndonjë drejtor prej vërteti i kësaj administrate, do guxonte të bënte diçka të tillë si “mbushja e kutive me vota”. Përvoja e dy viteve të fundit ka treguar se pas çdo denoncimi, të përfolurit e kësaj administrate pushohen nga puna nga shefat “frikacakë”, ndryshe nga PD që i mbronte me vetëmohim dhe “burrni”, sa më të madh ta kishin zullumin. Madje i bën edhe deputetë e sekretarë të përgjithshëm partie. Policët kallëzohen penalisht apo pezullohen, ndërsa një zv.ministre u largua se nuk kishte paguar dritat e një shtëpie të mbyllur në plazh. Pra, pse të rrezikosh kot, kur këta “nuk ta dinë”? Ndërsa Berisha, eeehh, ai ishte ndryshe.

Megjithatë, edhe një herë le të nënvizojmë se opozita duhet inkurajuar të ngrejë sa më shumë zërin për raste të tilla. Mbase vjen një moment, autosugjestionohet dhe bindet dhe vetë se e ka të vërtetë dhe gjenuine protestën, denoncimin, akuzën. Dhe e kupton se si ka qeverisur për shumë vite dhe ç’dëm të tmerrshëm i ka bërë këtij vendi. Por kjo e fundit është thjesht një ëndërr e pamundur…