Dokumente sekrete të filtruara nga WikiLeaks zbulojnë se Bashkimi Europian ka në plan të realizojë ndërhyrje ushtarake kundër barkave që transportojnë refugjatë që vijnë nga veriu i Afrikës.
Sipas WikiLeaks plani është miratuar nga Komiteti Ushtarak i Bashkimit Europian më 18 maj dhe në të detajohen operacionet ushtarake kundër rrjeteve dhe infrastrukturës së transportit të emigrantëve nga territori i Libisë, për të bërë të mundur që ato të mos arrijnë në Europë.
Plani rekomandon përdorimin e aftësive “të vigjilencës, inteligjencës dhe informacionit” të shteteve anëtarë të BE-së dhe partnerëve të saj dhe nuk përjashton përdorimin e forcës ushtarake kundër luftëtarëve të organizatës xhihadiste Shteti Islamik në Libi.
WikiLeaks thekson se këto dokumente janë larg strategjisë së mëparshme të Bashkimit Europian dhe që organizatat e mbrojtjes së të drejtave të njeriut kanë paralajmëruar se kjo politikë e re vë në rrezik jetën e emigrantëve dhe refugjatëve që përpiqen të shkojnë në brigjet evropiane.
Dokumentet tregojnë gjithashtu se blloku rrezikon të marrë kritika të ashpra nëse viktimat njerëzore i atribuohen veprimit, apo mos veprimit të BE-së. Në fund dokumentet e filtruara pranojnë “nevojën për të studiuar me kujdes rëndësinë e aktivitetit ushtarak”, veçanërisht në ujërat territoriale dhe brigjet libiane, “për të evituar destabilizmin e procesit politik.
Rreth 1750 emigrantë kanë vdekur në Mesdhe që prej fillimit të vitit, sipas Organizatës Ndërkombëtare për emigrimin.
Vetëm prillin e shkuar rreth 700 refugjatë që udhëtonin në një barkë u mbytën në kanalin e Sicilisë në përpjekje për të kaluar nga Libia në Itali. Madhësia e tragjedisë dhe reagimi i komuniteti ndërkombëtar nxiti Këshillin Europian që të përpunojë një plan për shpërndarjen e refugjatëve mes shteteve anëtare.