KAMORRA NË TIRANË

Njoftimet e para nga vendngjarja e bënë gati-gati personazh rastësor, një italian që ishte gjendur mes plumbave të një ngjarjeje komplekse atentat-kundërpërgjigje, e cila gjithsesi u zhvillua në fare pak minuta. Ajo që po ashtu, nga të dhënat fillestare u përkufizua si “mafia e kromit”, rezultoi se zgjatimit kryesor të hakmarrjes e kishte në Holandë, ku një muaj e gjysmë me parë ishte vrarë vëllai i atentatorit. Dhe po kaq shpejt, doli se napolitani Salvatore Letizia nuk ishte ndonjë student a punonjës italian që kishte zgjedhur për kollajllëk dhe rehati Shqipërinë, por një i dërguar i një klani të Kamorrës.

Përgjithësisht krimi i organizuar ose jo aq i organizuar shqiptar, i ka zgjidhur hesapet mes vedi. Në rastin konkret, hetimet janë ato që do ta thonë të tyren për zbardhjen e një atentati “të shkuar keq”, por prania e një kamorristi në Tiranë dhe vrasja e Holandës ku në prillin që kaloi u ekzekutua vëllai i atentatorit Sulku, edhe ky i vrarë në ngjarjen e para dy ditëve, zor e përmbyll kornizën në një hakmarrje tipike shqiptare. Përkundrazi.

Mund të quhet ters përkimi me vizitën e kryeministrit serb Vuçiç në Tiranë, por në fakt ishte fat, që përqëndrimi i një trupe të ngjeshur policore në kryeqytet solli kapjen e shpejtë të atyre që mbetën gjallë. Në të kundërt, ndoshta sot do flisnim për të larguar në drejtim të paditur. Një fat i trishtë, në fakt, që hedh dritë mbi një të vërtetë të hidhur: Që ndërsa tentojmë të integrohemi në Europë, krimi është integruar dhe organizuar shumë më herët. Duke u bërë prej shumë vitesh tashmë, pjesë e rrjeteve të sofistikuara ose më pak të tilla në Itali, Zvicër, Holandë, Gjermani, Angli e gjetkë. Dhe ky krim ka përballë një shtet të dobët, megjithë përpjekjet e deritanishme të strukturave të tij, megjithë iniciativat për dekriminalizim të politikës.

Nuk mund të mos vijnë në mendje përcaktimet e eruditit Moikom Zeqo, që pikërisht për betejën politike mbi dekriminalizimin, do ta nënvizonte në DITA një muaj e pak më parë, si një proces tejet të ndërlikuar dhe jashtëzakonisht i vështirë. “Vështirësia qëndron në faktin se një pjesë e politikanëve kryesorë në këtë vend janë pasuruar në mënyrë të marrëzishme”, thotë Zeqo, “por mendoj se ne kemi zgjedhur modelin politik të gabuar, modelin politik të Italisë ku shteti asnjëherë nuk e ka mundur mafien. Italia ka një magjistraturë të njohur. Ka gjykatës dhe hetues dhe prokurorë të famshëm që janë edhe sakrifikuar. Por një pjesë e mafies është futur në politikë, pjesëtarë të mafies ka edhe si eurodeputetë. Ne duhet të kishim zgjedhur modelin politik të Amerikës ose të Gjermanisë ku shteti është gjithmonë mbi mafien, e shtyp mafien”.

Parimisht Moikomi ka të drejtë. Mbase me një saktësim. Nuk e dimë a e zgjodhëm ne modelin apo na zgjodhi ai ne. Ne këto 25 vite nuk është se “vumë gishtin” mbi modelin italian. Ne thjesht vendosëm të ndërtojmë një shtet në funksionin dritëshkurtër të mbajtjes së pushtetit me çdo kusht, me çdo marifet. Dhe kur bën këtë zgjedhje, je gati të bësh cilindo lëshim, kompromis, e pastaj krim në funksion të ruajtjes së pushtetit. Dhe vijmë në momentin kur çdo vullnet pozitiv has në një vështirësi gjithnjë e më të madhe. Përfshirë dhe episode si ky i para dy ditëve, kur nuk ka nevojë të shkojmë tek kamorra, sepse vjen ajo në Tiranë.

 

 

Kapo i klanit mafioz

Kur kanë kaluar 24 orë nga beteja e përgjakshme me armë në “Bulevardin Zogu i Parë” me 3 të vrarë dhe 3 të arrestuar, zbardhen detaje të tjera nga hetimi rreth ngjarjes, motiveve dhe të kaluarës mes palëve.

Italiani i arrestuar mbrëmjen e së mërkurës, i cili u përplas me makinë nga nipi i të vrarit Mentor Lufi (Doçi), nuk është thjesht një vrasës me pagesë.

Ai identifikohet si kapo i klanit mafioz të Kamorrës në Itali, i quajtur Letizia-Piccolo.

Ky grupim vepron në zonën e Kazertës në Napoli dhe që ka pasur rivalitet të përgjakshëm për zotërimin e zonave të trafikut të drogës, prostitucionit apo veprimtarive të paligjshme.  Salvatore Letizia, 33 vjeç, rezulton edhe si person me precedentë të mëparshëm penalë, disa herë i arrestuar dhe një herë i plagosur.

Policia dyshon se italiani i është bashkuar Besnik Sulkut në këtë atentat, pas ndonjë njohje të mëparshme në aktivitetin e trafiqeve që kryenin, ose ndonjë marrëveshjeje që kanë bërë së fundmi që pasi të kryenin këtë punë dhe të merrte gjakun e të vëllait, Sulku ta ndihmonte në linjën Itali-Holandë.

Fakti se Letizia ka pasur fotografinë e Lufit në xhep, për hetuesit nuk do të thotë se ai është një vrasës me pagesë, por thjesht të identifikonte shënjestrën që do qëllonte.

Ndaj tij është ngritur akuza e “vrasjes në rrethana cilësuese, e kryer në bashkëpunim” dhe “armëmbajtje pa leje”.

Në një shkrim të botuar nga media italiane “Casertasette.com” në muajin janar 2007, kur policia arrestoi Letizian, në atë kohë vetëm 25 vjeç, shkruhej se ai drejtonte klanin mafioz në zonën e Marcianises, ku edhe ka vendbanimin.

Letizia u arrestua nga agjentët e Casertas në një operacion të befasishëm pranë zonës industriale më 23 janar 2007. Ai mbante të veshur një jelek antiplumb dhe iu kap një armë pistoletë, të cilës i ishin fshirë numrat e serive.

Policia dyshonte se ai po përgatiste një atentat për të sulmuar klanin rival të tij për rivalitet të kontrollit të territoreve, por u parandalua pas sinjaleve që morën karabinierët.

Bashkë me të u arrestua edhe miku i tij Giovani Timbone, 34 vjeç.

“Letizia është kapo i klanit Letizia-Piccolo në Marcianise dhe ka një rivalitet e konflikte me klanin tjetër mafioz Belforte, po në këtë zonë, për të dominuar territorin”, shkruanin mediat pas arrestimit të 33-vjeçarit.

Ndërsa Letizia rezulton se është plagosur edhe në vitin 2001, gjatë një atentati ku u vra miku i tij Ferdinando Latino.

Të dyja grupet në konflikt janë klane të KamorraS që vepron në Napoli. Mes klaneve Piccola-Letizia dhe Belforte ka pasur shumë të vrarë dhe të plagosur ndër vite, përveçse të arrestuar nga policia italiane.

 

Pse e ndihmoi Sulkun

Hetimet e kryera deri tani nga Policia e Tiranës dhe Prokuroria e Krimeve të Rënda që ka marrë dosjen për kompetencë pasi bëhet fjalë për një luftë bandash kriminale për shkak të trafiqeve, tregojnë se italiani Salvatore Letizia është i përfshirë direkt në atentat.

Ai është thirrur nga Besnik Sulku, me qëllim që ta ndihmonte në marrjen e gjakut për të vëllanë, Durim Sulku, i vrarë më 6 prill në Holandë.

Shqiptari mund t’ia ketë kërkuar si nder Letizias, për ta ndihmuar më pas në aktivitetin e trafikut në linjën Itali-Holandë, që do i sillte përfitime më të mëdha.

Ndoshta edhe për të “kapur” një segment të linjës Itali-Shqipëri dhe zgjeruar këtë aktivitet.

Durim Sulku, i vrarë në Holandë, sipas mediave të këtij vendi dyshohet se ishte i përfshirë në trafik të narkotikëve dhe krimi ndodhi po për këto hesape.

Për të mos humbur këtë linjë të fortë trafiku, duket se grupi italo-shqiptar ka ndërmarrë edhe atentatin e të mërkurës, megjithë riskun e një dështimi pasi Tirana ishte e blinduar me policë.

Italiani ka qenë i pajisur me një pistoletë tip “Glock”, që u sekuestrua si provë materiale, ndërsa është gjetur i plagosur dhe i fshehur pas një hoteli afër vendngjarjes, duke u përpjekur të fshinte provat.

Policia tha se ai ishte plagosur me makinë nga Markeljan Doçi, nipi i Mentorit që u vra, pasi e pa teksa qëllonte me armë mbi xhaxhanë e tij.

Ndërsa nipi hakmerrej ndaj Besnik Sulkut, Letizia përfitoi për të ikur me vrap, edhe pse i plagosur.

Gjatë kontrollit fizik, policia i gjeti në xhep edhe fotografinë e viktimës Mentor Lufi. Napoletani nuk ka pranuar asnjë akuzë, duke mohuar përfshirjen në atentatin e Tiranës dhe bashkëpunon shumë pak me hetuesit.

Por prokuroria shqiptare tha se provat janë të mjaftueshme për ta gozhduar napolitanin.

 

Erdhi në Tiranë 8 orë para atentatit

Salvatore Letizia ka mbërritur në Tiranë vetëm 8 orë para se të kryhej atentati i mbrëmjes së mërkurë para maternitetit, përballë Fakultetit të Shkencave.

Prokuroria e Krimeve të Rënda që po heton ngjarjen ka zbuluar se ai ka hyrë nga Rinasi rreth orës 13:15 të pasdites, pasi ka fluturuar me një nga linjat ajrore Romë-Tiranë. Pas kontrollit në aeroport ka kaluar pa probleme, edhe pse ishte një person me precedentë të kaluar penalë.

Më tej ka kontaktuar Besnik Sulkun dhe kanë bërë planin e atentatit, megjithëse Tirana gëlonte nga 1500 efektivë policie që ishin në gatishmëri për shkak të vizitës së kryeministrit Serb në Shqipëri /A.Q