Nënkryetari i Partisë Demokratike, Edmond Spaho, ka denoncuar gjatë një konference për shtyp mbështetjen, sipas tij, që policia po i bën personave të përfshirë në ngjarjen e rëndë, ku u dhunuan 2 punonjës të Bashkisë Sukth dhe sekretari i seksionit të PD-së të fshatit Kullë.
“Edhe një herë po ngremë shqetësimin e thellë për ngjarjen e rëndë që ndodhi pardje në Bashkinë Sukth.
Në ambientet ku u zhvillua dy ditë me parë aktiviteti i kandidates së PD-së për Bashkinë Durrës, Grida Duma, u sulmuan në mënyrë të dhunshme dy punonjës të Bashkisë Sukth dhe sekretari i seksionit të PD-së të fshatit Kullë duke i goditur me mjete të forta dhe tytën e pistoletës dhe kërcënuar me jetë nga përfaqesues të shtabit elektoral të Vangjush Dakos në këtë Bashki.
Komunikata e policisë, në mënyrë të qëllimshme ka gënjyer, duke shpallur në kërkim vetëm dy nga autorët që kanë kryer aktin e dhunshëm. Sipas filmimeve që ju kemi paraqitur dhe dëshmive të tre të plagosurve, tregohet qartë që veç personave që janë shpallur në kërkim, autor kryesor i sulmit të dhunshëm është Berti Hoxha.
Në këtë mënyrë policia është bërë pjesë e këtij skenari me qëndrimin mbrojtës ndaj autorit kryesor, i cili nuk u ndalua megjithë kallëzimin e bërë dhe dëshmitë e dëshmitarëve okularë në vendngjarje”, u shpreh Spaho.