A e di i ligu që është një i lig?!

Arben Duka

(Temë për debat)

Tani për shumë gjëra,
nuk kam më dyshim:
“Që të jesh i mirë,
nuk kërkon sforcim!”

Vetes si qëllim,
s’ia vë dot njeriu,
sepse mirësia,
të ndodh vetvetiu!

Të mirët i njoh,
mes tyre kam miqtë,
po enigmë për mua,
kanë mbetur të ligjtë!

Veten time shpesh,
e pyes-or mik:
“A e di i ligu,
që është një i lig?!”

A e di që është,
një zemërlugat,
dhe veten e tij,
me ç’metër e mat?!

Nuk dimë si peshon,
as llojin e metrit,
s’dimë në e kupton,
lëndimin e tjetrit?!

Nëse s’kupton veten,
nuk di se ç’të them,
ligësi e tij,
është goxha problem!

Është vërtetë problem,
si zjarri-si thika,
për një që s’kupton,
se po bën të liga!

Kur është thjeshtë i lig,
dhe nuk ka pushtet,
një rrezik i madh,
s’është në të vërtetë!

Po nëse ka ngjitur,
majën e pushtetit,
mund të vijë prej tij,
ditë e kiametit!

E gjithë jeta kthehet,
në një stinë tmerri,
si dikur Neroni,
dhe më pas Hitleri!

Qindra diktatorë,
që koha ka parë,
ligësi e tyre,
i bënte krenarë!

Gjersa nuk po kthehet,
Zoti ynë i ndritshëm,
tregon se të liqtë,
kanë qenë të fuqishëm!

Janë të fuqishëm,
bardhë e kuq e blu,
si në gjithë Botën,
kemi dhe këtu!

Gjersa kemi shkuar,
lumë e për më lumë,
tregon se të liq,
kemi pasur shumë!

Kemi pasur shumë,
sa një Zot e di,
i ligu i të liqve,
është shoku Sali!