Drejtori i Shërbimit Informativ Shtetësor Visho Ajazi ka raportuar sot në Komisionin e sigurisë për ligjin për mbikëqyrjen parlamentare të Shërbimeve Informative dhe të Sigurisë.
Në fjalën e tij, Ajazi ka theksuar se në përgjithësi ligji është i mirë por nuk përcaktohet saktë fusha e veprimit të tij.
“Kur ligji të diskutohet nen për nen, ne do të japim objeksionet tona” ka theksuar kreu i SHISH-it
Ndërsa përfaqësuesi i Prokurorisë së Përgjithshme, Thoma Jano ka theksuar se projektligji ka nevojë të riformulohet në disa nene, pasi sipas tij cënohet pavarësia e Prokurorisë.
“Ligji është i mirë, duhet të jetë i qartë me funksionet e nënkomisionit të mbikëqyrjes” ka shtuar Jano.
Ndërsa përfaqësuesja e një OJF-je, Kozara Kati është shprehur se ligji ka nevojë për debat pasi sipas saj ka përplasje në disa nene të tij. “Duhet diskutuar për të mbrojtur të drejtat e njeriut” ka shtuar Kati.