SHËNIM: Shqipëria, mes Ibrahimit dhe Lulzimit

Mbiemri i njëjtë është rastësor. Mes Lulzim Bashës dhe Ibrahim Bashës së ndjerë nuk ka asgjë të përbashkët. Megjithëse të dy të rinj, rrugët e tyre të jetës kanë qenë kaq të kithëta dhe perspektivat kaq të ndryshme saqë ndoshta asgjë në botë nuk do t’i bënte bashkë. Por ndodhi kjo që ndodhi dhe kryetarin e PD-së me dëshmorin e forcave RENEA i bashkoi… Lazarati. Plot 23 ditë para se një plumb snajperi i nisur për të zënë në mish t’i merrte jetën Ibrahimit, Lulzimi kreu në Lazarat mitingun më të madh të kësaj fushate elektorale për zgjedhjet vendore. 23 ditë më pas, gjëja e parë që kreu i opozitës kishte për të thënë për vrasjen e një oficeri të trupës speciale policore RENEA, ishte një kritikë për policinë e shtetit që dërgonte në Lazarat edhe furgonë jo të blinduar, çka solli shkaktimin e viktimës. Vini re, nuk e kishte me vrasësit që kishin bërë gati pritën, që kishin rrafshuar mure e gardhe për të pasur pamje më të plotë, që pritën të vinin specialët dhe shtinë prej së largu (siç konfirmojnë hetimet e deritanishme), por me mungesën e një blindi.

Nuk e dimë nëse Basha (ky i gjalli) shkoi me makinë të blinduar në Lazarat, por mund ta themi me siguri se makinat që përshkojnë përditë rrugën nacionale poshtë fshatit nuk janë të blinduara. Dhe snajperët e çakërdisur, largqoftë mund të kishin bërë më parë prova me këdo që kalonte asaj ane. Dhe me këtë linjë arsyetimi, nuk është çudi që kreu i PD-së të fajësonte më parë shoferët e papërgjegjshëm që bredhin pa makinë të blinduar, sesa të gjente diçka që nuk shkon pak më lart, në fshat.

Nuk ka asgjë të keqe nëse një fshat voton i tëri një forcë të caktuar politike. E keqja është tek arsyeja përse e bën këtë. Dhe në rastin e Lazaratit është e qartë se ngritja e këtij fshati në statusin e një republike autonome të kultivimit e trafikimit të narkotikëve dhe mbretërimit të krimit, e rrjedhimisht pasurimi i shumë prej banorëve është një zhvillim për të cilin Lazarati ja di për nder PD-së. (Kjo, shumë më tepër sesa fakti që fshati filloi të votojë “djathtas” që në vitet 90 sepse ka qenë i persekutuar nga regjimi komunist). E keqja edhe më e madhe, është pastaj tek identifikimi i turpshëm i PD-së me këtë fenomen sot e kësaj dite. Sepse kjo parti nuk ka ndërruar kurrë qëndrim dhe as është tërhequr ndonjëherë nga shpallja që kryetari faktik i saj, Berisha, bëri një vit më parë publikisht: Po, unë e kam lejuar kultivimin dhe trafikimin e hashashit në Lazarat, ishte një zgjedhje politike e imja?!

Në këtë pikë, mund të thuhet se më shumë sesa Lazarati është i PD-së, kjo e fundit është e Lazaratit. Dhe në rastin e Lulzim Bashës, është e qartë se ai as që bëhet fjalë të distancohet haptaz nga ky qëndrim i Berishës, paçka se do ishte lumturi për të gjithë nëse kjo do ndodhte. Por në mungesë të fakteve e argumentave për të kundërtën, unë besoj se nëse PD vjen që nesër apo pas dy viteve në pushtet, sërish në fshatin zulmëmadh do fillojë kultivimi i drogës.

Në fakt, kjo e fundit, kultivimi i drogës së opiumit, ishte aktiviteti më paqësor me të cilin përballej Ibrahim Basha në misionet e tij në Afganistan. Nga ky vend ku talebanëve u janë shtuar edhe ithtarë të ISIS-it, shanset për t’u kthyer shëndoshë e mirë tronditen rëndshëm sidomos kur je me mision ushtarak. Gjithsesi djaloshi ja doli të kthehej, ashtu si dhe nga shërbimet në Irak. Vendosi të bëjë kërkesë që të rekrutohej në RENEA, padyshim sepse i kishte të gjithë cilësitë e duhura, por ma ha mendja, edhe me besimin se krahasuar me ç’i kishin parë sytë deri atëherë, gjithçka në pjesën shqiptare të karrierës së tij në shërbim të shtetit do ishte më e lehtë. Rruga e tij që u ndërpre para dy ditësh, ishte ajo e një të riu nga një familje e madhe me shumë fëmijë, që çan përpara me punë, kualifikim dhe shërbim të devotshëm ndaj vendit. Hap pas hapi, mision pas misioni. Nuk kishte mundësi për ashensor privat në pallat, që të çon drejt apartamentit të tij dupleks. Nuk avullonte qindra milionë euro me një firmë. As qindra km katror det. Në dhjetor 2014 u pranua dhe sapo kishte mbushur gjysmë viti në trupat speciale policore.

Sot ai nuk mund të flasë e të thotë pse pranoi të hipë në furgonin e pablinduar të RENEA-s; mbase shokët e tij po. Por nëse ai nuk mundet, Basha tjetër nuk Duhet të flasë nëse ka ndërmend të thotë broçkulla. Se po vazhdoi kështu, do t’u kërkojë llogari viktimave të 21 janarit pse nuk vishnin antiplumb. Më e udhës do ishte të nxjerrë Lazaratin nga PD-ja dhe ta kuptojë se Shqipëria, mes tij dhe Ibrahimit, zgjedh Ibrahimin.