Dhrahmia e shpëton edhe vetë Evropën!

“Edhe e kundërta e çdo ideje, mbart një logjikë…”(MONTAIGNE)

E di mjaft mirë që është e vështirë… Po ta kisha në xhep një Çmim për Paqen, do të ishte pak më e thjeshtë t’ju mbushja mendjen se teza ime është e duhura për të shmangur shpërbërjen e Evropës së Bashkuar, zgjidhjen e krizës financiare, jetëgjatësinë e NATO-s dhe fundin e konflikteve në Lindjen e Mesme.

E di mjaft mirë që është e vështirë për ju. Të besoni, në këtë kaos, se vetëm Greqia mund t’ia dalë të ndërtojë një rend të ri botëror… Një rend të ri, i cili do të ishte fillimi i fshirjes së njollave të zeza nga gjithë historia e shkruar e njerëzimit me gjithsej vetëm 230 vite paqe në të.

Çelësi është Greqia dhe dera e parë për t’u hapur, Turqia. Dhe kjo nuk është utopi … Greqia duhet të nisë projektin e monedhës së përbashkët me Turqinë dhe më pas me të gjitha vendet e Lindjes, gjithkund ku përdorej në paqe Dhrahmia apo Dirhemi siç njihet ndryshe…

Ekonomistët e sotëm nuk duan ta dinë, por Dhrahmia ishte monedha e “bekuar e Zotit”, me përdorimin më të gjatë, si asnjë tjetër, për më shumë se 2000 vite, pa asnjë ndërprerje. Më e hershme se vetë Perandoria Bizantine, më e suksesshme se çdo monedhë tjetër edhe pas ardhjes së Islamit. E përdorur në vendet arabe, në Iran, Izrael, Armeni, madje e përdorur deri në ditët e fundit të Perandorisë Otomane, dhe më e çuditshmja është se asnjë popull që e përdori nuk u zhduk nga harta.

Ky përdorim dhe bindje ndaj Dhrahmisë, në gjithë këto vende ishte reflektim i drejtpërdrejtë i mësimeve të globalistit të parë jo profet, Aleksandrit të Madh dhe më pas të Jezu Krishtit, i cili e ndaloi rreptësisht konvertimin e një monedhe në një tjetër.

***

Greqia në vitin 2000 mori vendim të heqë dorë nga Dhrahmia dhe “të vërë dorë” mbi Euron. Ajo ish dita e mallkimit të Zotit, jo vetëm mbi Greqinë, por mbi të gjithë ne: ish prelud i këtij realiteti gllabërues që na ka ngërthyer sot. Fill pas këtij vendimi, ndodhën sulmet e 11 Shtatorit… Luftrat, trazirat, kriza e ushqimeve madje edhe fatkeqësi natyrore të paimagjinuara. Dhe e gjithë kjo, nuk ishte rastësi… Pra, as shkenca, as politika bile as ekonomia nuk po i shpjegon dot. Por në të vërtetë ishte një mallkim! Ashtu si kundër nuk ka tjetër shpjegim, veçse Zoti ia shpërbleu Armenisë sapo kaloi nga rubla në drama dhe ia pushoi luftën me Azerbajxhanin; Emirateve të Bashkuara u dha një zhvillim të pakrahasueshëm dhe pranvera arabe nuk “e flladiti” aspak Marokun që përdor ende Dirhem-in.

Çfarë duhet të bëjnë grekët e sotëm? Po shteti i tyre…?

Ata trashëgojnë një pasuri të vyer dhe duhet të mbajnë përgjegjësi historike ndaj dhrahmisë, ndaj asaj monedhe që ish shtrirë në tre kontinente, që i paqtoi e i mbrothësoi ato vise ndër shekuj, që evropianistët, sot e 30 vjet po përpiqen ta ringjallin shëmbëlltyrën e saj tek Euro. Sot, tregjet greke duhet të njihen sa më parë me Lirën turke dhe ta përdorin atë bashkë me Euron, për një periudhë 10 vjeçare, të paktën derisa të dalin me të njëjtën monedhë me Turqinë. Kështu, vetiu së bashku, do të hedhin hapat e munguar ndër dekada. Një hap i tillë, e shpëton shpërbërjen e Bashkimit Evropian, pasi Brukseli do ndërgjegjësohej kësisoj mbi rrezikshmërinë e kapitalit të vet nacionalist, shkak ky i të dy luftrave botërore.

Të menduarit konkret për Dhrahminë apo thënë ndryshe Dirhem-in, do të ngjallte entuziazmin e munguar të tregjeve evropiane dhe Greqia do të bëhej pikë-takimi i dikurshëm i lakmisë së Perëndimit për tregjet e Lindjes…

Diskutimi për monedhën e përbashkët greko-turke, do të çarmatoste të dy brigjet e Egjeut. Ky diskutim i gjerë e mbarë rajonal do të shuajë konfliktet në Lindjen e Mesme, do të rivendosë harmoninë. Nëse të gjitha vendet arabe, Irani, Turqia, Izraeli, Greqia e Palestina do të kenë një monedhë të përbashkët do të binden më lehtë se edhe Zoti është po i njëjtë.

E kështu do të jetë, madje së shpejti! Sepse themelet e monedhës së përbashkët, Dhrahmisë apo ndryshe Dirhem-it, janë në historinë e largët dhe afër. Ato sot thjesht janë zënë nën rrënojat e injorimit dhe mospërfilljes së fakteve, thjesht kërkojnë mençurinë e rigjetjes së shtigjeve të dikurshme të begatisë e të paqes.

Drejtuesit e vendit grek, bëjnë mirë ta shohin shpëtimin e vendit duke parë edhe nga Lindja, qoftë edhe me një sy… përdorimi i dhrahmisë si dikur e shpëton vetë Evropën…