Itali, arrestohen “Skifterët” binjakë, akuzohen se kryen mbi 100 vjedhje

Dy vëllezër binjakë nga Shqipëria janë vënë në pranga nga policia italiane në Cuneo, me akuzën se kanë kryer mbi 100 vjedhje në vendin fqinj.

Edmond dhe Eduard Trushi, 30-vjeçarë, nga Shkodra, janë arrestuar në kuadër të operacionit të koduar ‘Binjakët’.

Gjatë kontrollit të ushtruar në banesën e tyre, karabinierët  gjetën të fshehura në një kafaz të madh pëllumbash (pas të cilëve mesa duket binjakët kanë qenë të apasionuar), bizhuteri dhe orë të vjedhura me vlerë të lartë.

Në shtëpi janë gjetur gjithashtu edhe 25.000 euro kesh dhe sende të tjera me vlerë. Sipas prokurorëve, dy të arrestuarit po përgatitshin të largoheshin për në Shqipëri bashkë me paratë dhe sendet e vjedhura. 30-vjeçarët sipas hetimeve, kanë pasur në objektiv të veprimtarisë së tyre të paligjshme sidomos provincën Cuneo, veçanërisht Saluzzesse, por ka dyshime të forta se ata janë përgjegjës për mbi 100 vjedhje në gjithë zonën e veriut, nga Veneto në Toscana.