Pas rezultateve turpëruese, jep dorëheqjen trajneri i Greqisë

Trajneri uruguajan i ekipit kombëtar grek të futbollit, Sergio Markarian ka dhënë sot dorëheqjen, pesë muaj pas marrjes së detyrës.

“Erdha në Greqi për të ndihmuar ekipin kombëtar në një moment kritik. U kërkoj falje tifozëve pasi rezultatet nuk kanë qenë në lartësinë e pritshmërisë së tyre”, theksoi ai.

Trajner i Perusë (2010-13) dhe Paraguajit (1999-2001), Sergio Markarian, 70 vjeç, kishte nënshkruar një kontratë prej 350 000 eurosh me Federatën Greke të Futbollit.

Ekipi grek humbi para pak ditësh ndaj ekipit modest të Ishujve Faroe (1-2), ndeshje e vlefshme për Euro 2016.

Sidoqoftë, presidenti i Federatës Greke të Futbollit, Jorgos Jirxiqis deklaroi se nuk do ta pranonte dorëheqjen e Markarianit. “Unë besoj te ai”, deklaroi Jirxiqis.

Greqia është e fundit e Grupit F për eliminatorët e Kampionatit Evropian me katër humbje dhe vetëm dy barazime. Ekipi grek është mundur dy herë nga Ishujt Faroe, që konsiderohen një nga ekipet më të dobëta në Evropë.