Cipras: Katastrofa që do kishte ndodhur nëse do thosha jo

Kryeministri grek, Aleksis Cipras, ka pranuar dështimin për të shndërruar koalicionin e Syrizas në një parti të bashkuar, edhe pse ka theksuar se nuk ka marrë masa represive kundër deputetëve disidentë që votuan kundër masave të kursimit për të përfituar programin e tretë të shpëtimit.

Cipras kritikoi opozitën e brendshme në radhët e partisë së tij dhe tha se është përpjekur të manipulohet rezultati i 5 korrikut për shpëtimin financiar. “Grekët votuan kundër një marrëveshjeje të keqe, nuk votuan jo, për të kërkuar daljen nga euro.

Tani ka njerëz që po përpiqen të manipulojnë rezultatin”, argumentoi kryeministri helen në një intervistë për radion Sto Kokkino. Kryeministri ka pohuar se nuk është penduar për mënyrën se si Athina u përball me negociatat me kreditorët dhe mbrojti idenë se dëmi ekonomik i shkaktuar nga kontrolli i kapitalit “nuk është i pakthyeshëm”.

Lideri grek gjatë intervistës u shfaq optimist për një ristrukturim të borxhit dhe në lidhje me reformat që Athina duhet të bëjë, ai pohoi se ekzekutivi nuk do të miratojë masat shtesë ndaj atyre të rëna dakord me eurogrupin. “E njoh mirë marrëveshjen që firmosëm në samitin e eurozonës 12 korrikun e shkuar”, shpjegoi Cipras .

“Do të vëmë në zbatim ato që dakordësuam, pavarësisht se nuk jemi dakord me to”, tha ai. Duke u bërë pak më shumë sentimental, kryeministri grek pranoi gjithashtu se nëse gjatë negociatave me liderët e eurozonës do të kishte bërë atë që “i thoshte zemra”, të ngrihej nga tavolina dhe të largohej, bankat do të ishin fundosur menjëherë.

“Nëse do të kisha bërë atë që më kërkonte zemra gjatë negociatave 17 orëshe, do të kishin ndodhur një sërë ngjarjesh që do të kishin çuar në humbjen e të gjitha depozitave bankare”. Sipas tij në fillim do të ishin mbyllur degët e bankave jashtë vendit dhe më pas Banka Qendrore Europiane nuk do të pranonte garancitë e bankave greke në këmbim të kredive emergjente, gjë që do të çonte në falimentimin e të gjitha bankave dhe humbjen e mëpasshme të depozitave.

Në fund të intervistës, lideri grek gjithashtu pohoi se dalja e vendit helen nga eurozona do të jetë ende në tryezë derisa të mos ekzistojë një marrëveshje për lehtësimin e borxhit. Ai theksoi se nuk do të zgjidhje të parakohshme edhe pse disidentët në gjirin e partisë e tij mund t’i detyrojnë.