Thaçi në KS: Daçiç ka lindur në Kosovë nga prindërit e tij kolonizues

Thaçi ka polemizuar me ministrin e jashtëm të Serbisë Ivica Daçiç rreth anëtarësimit ë Kosovës në UNESCO. Ai tha se Kosova ka aplikuar për këtë anëtarësim e përkujtoi se disa shtete në botë para se të bëheshin anëtare të KB-së, janë bërë anëtare të UNESCO-s, transmeton Koha.net.

“Objektet e trashëgimisë kulturore janë më sigurta tani se sa gjatë 1000 vjetëve të shkuara. Kishat ortodokse serbe ruhen nga polica e Kosovës», tha Thaçi dhe shtoi se «lufta ne Kosovë nuk ka qenë luftë fetare. Ka qenë luftë që e ka filluar Serbia ashtu siç e ka nisur luftën edhe me Kroacinë e me Bosnjën”.

Ai ftoi anëtarë e KS që t mbështesin kërkesën e Kosovës për anëtarësim në UNESCO.

Thaçi e akuzoi Daçiçin për fjalorin e ashpër të përdorur ndërsa shtoi se megjithëkëtë bisedat për normalizim marrëdhëniesh ndërmjet dy vendeve do të vazhdojnë . Ai përkujtoi takimin e ardhshëm në Bruksel dhe përmendi disa nga marrëveshjet që pritet të nënshkruhen.

Shefi i diplomacisë së Kosovës tregoi për autostradën që do të ndërtohet në Serbi për t’u lidhur ky vend me bregdetin shqiptar.

«Kosova po e lufton ekstremizmin islamik. Jemi kampion në këtë luftë dhe jemi me luftën e Aleancës kundër ISIS-it», tha Thaçi.

“Daçiçi ka lindur në Kosovë dhe unë i kam ofruar atij të marrë pasaportën e Kosovës. Por Daçiç nuk ka treguar se të parët e tij erdhën si kolonizues ndërmjet dy luftërave në Kosovë”.

Për grafitet e shkruara në manastirin Deçanit Thaçi tha se ato i ka shkruar shërbimi sekret serb.

Ai i tha Daçiçit “në Kosovë nga Serbia janë shkatërruar 300 objekte fetare, keni vrarë mbi 15 mijë njerëz të Kosovës, keni dëbuar mbi 1 milion shqiptarë nga vendi. As ushtria as policia dhe as administrata serbe kurrë më nuk do të kthehen në Kosovë”, tha ndër të tjera Thaçi./dialogplus