Banesat sociale, Veliaj u dorëzon çelësat 30 familjeve të para 

Nga sot 30 familje që përfituan banesa sociale nga vendimi i Këshillit Bashkiak nuk janë më të pastreha. Ato kanë marrë në dorëzim shtëpitë e tyre nga kryetari i Bashkisë, Erion Veliaj.

Kryebashkiaku u dorëzoi atyre çelësat dhe dokumentacionin e përkatës, çka i bënë ata pronarë të këtyre banesave. Në fjalën e tij Veliaj ndërsa ka evidentuar faktin se brenda 1 muaji realizoi një nga premtimet e tij të fushatës elektorale.

Mes 30 familjeve është dhe këngëtari i njohur i muzikës së lehtë shqiptare, Tonin Tërshana, si dhe banorë të komunitetit romë që dy vite më parë u nxorën forcërisht në rrugë te zona e pallatit me shigjeta. Në fjalën e tij, këngëtari Tërshana ka falënderuar kryetarin e Bashkisë që bëri të mundur që pas 20 vitesh edhe ai të kishte një shtëpi si gjithë të tjerët.

“Ne duhet të sjellim sot një model sesi mund të jetë një lagje e Tiranës. Ne duhet ta ruajmë këtë lagje dhe t’i tregojmë Tiranës një model të ri bashkëjetese. Dua shumë që këtë ambient dhe model ta ruajmë si gjënë më të shtrenjtë të qytetit tonë”, tha ai.

Më tej ai ka shfrytëzuar rastin që t’u bëj thirrje dhe gjithë ndërtuesve që të kontribuojnë në lehtësimin e çështjes së strehimit në Tiranë, duke i ftuar ata që të ulin çmimet e apartamenteve stok. Në të kundërt ai ka bërë të ditur se Bashkia që ai drejton do të përdorë mekanizmat ligjor për ti detyruar ata që të ulin çmimet sipas kërkesave të tregut.

“Dua t’u bëj një apel ndërtuesve dhe shoqatës së ndërtuesve në Tiranës. Kjo që po bëjmë nuk mjafton ndaj i kam bërë thirrje shoqatës së ndërtuesve të ulin çmimet e apartamenteve të pa shitura. Ka disa gjera që shteti mund ti bëj që t’i detyrojë privatët t’i binden rregullave të tregut. Për këtë arsye ne do propozojmë që në Këshillë Bashkiak që të paguhet taksa e pronës edhe për apartamentet e pa shitura. Nëse vendosin të ulin çmimet, atëherë të përgatiten të paguajnë taksën e pronës. Është e vetmja mënyrë se si ne mund t’i kërkojmë ndërtuesve të ulin çmimet”, tha Veliaj.