Policia dhe familja Cali përplasen mbi rrethanat e konfliktit me deputetin: Ndodhi brenda apo jashtë komisariatit?

Ka disa versione për dinamikën e ngjarjes së rëndë dje në Laç ku u implikua deputeti i Kuvendit Armando Prenga.

Në media janë hedhur dyshime që konflikti i armatosur ka ndodhur brenda komisariatit të policisë.

Kjo e fundit dje tha se ka ndodhur para dyerve të saj.

Sherri ka nisur në muajin mars, kur vëllai i Prengës fitoi një tender për të shfrytëzuar Lagunën e Patokut, ndërkohë që për shumë vite kjo lagunë shfrytëzohej nga familja Cali.

Dje ka ndodhur fillimisht një konflikt verbal mes deputetit Armando Prenga dhe Gjok Calit, pronar i një lokali atje.

Prenga shkoi të premten në orën 23:40 në lokalin e Calit.

Aty sherri degjeneroi në fyerje dhe sharje.

Sipas familjes Cali, deputeti ka nxjerrë një pistoletë, që thotë se e ka me leje dhe ka goditur Calin në kokë, me tytën e saj.

Pas incidentit, Gjok Cali ka telefonuar komisariatin e Laçit, për të denoncuar deputetin Prenga.

Ky i fundit ka telefonuar vëllanë e tij, Eduartin, dhe i ka thënë të nisej sa më shpejt drejt komisariatit.

Të dy palët kanë grumbulluar njerëz dhe janë nisur drejt komisariatit, ku edhe ka ndodhur sherri.

Në përleshjen masive janë përdorur dy armë zjarri, një automatik dhe një pistoletë, si dhe thika dhe shkopa bejsbolli.

Policia thotë se sherri ka ndodhur në dyert e komisariatit, por dëshmitarët thonë se sherri ka ndodhur në oborrin e komisariatit, madje edhe brenda në zyra.

Në sherr u përfshinë 30 persona, shumica e të cilëve u larguan, bashkë me një pistoletë, e cila nuk është gjendur.

Pikërisht kjo armë, që mendohet se i përket deputetit Prenga, por që nuk është ajo armë që ai thotë se e ka me leje, nuk është gjetur.

Ndërkohë policia thotë se ka sekuestruar një kallashnikov, që i përket Gazmir Jushit, mik i familjes Prenga.

 

DETAJET / Ngjarja e rëndë në Laç sipas policisë: Sherri mes dy familjeve nisur prej një viti

Shtatë persona janë plagosur pas përleshjeve që kanë ndodhur para komisariatit të Kurbinit, dje rreth orës 01.30 minuta të mëngjesit.

Por sherri mes tyre ka nisur gjysëm orë përpara në rrugën Patok Laç në afërsi të banesës së Gëzim Çelës bëjnë të ditur burime zyrtare të policisë së Kurbinit.

Në momentin e parë nuk ka patur të lënduar dhe palëtkanë nxituar të bëjnë kallzimin ne polici.

Të gjenduara njëkohësisht para komisariatit, ato kanë nisur ofendimet e më pas përleshjet fillimisht me armë të ftohta e më pas është përdorur edhe një armë zjarri pistoletë nga deputeti i Qarkut të Lezhës që sipas policisë e mbante me leje.

Ngjarja sipas policisë

Sipas burimeve zyrtare të policisë janë familjarë dhe të afërm të familjes Cali me banim në Fushë Kuqe të rrethit të Kurbinit ata që i kanë zënë pritë deputetit Armando Prenga në rrugën që lidh plazhin e Patokut me Laçin në afërsi të banesës së Gëzim Çelës.

Për ndalimin e mjetit të deputetit, familja Cali ka përdorur një automjet. Në momentin që deputeti ka ndaluar, kanë rrethuar makinën duke tentuar që ta zbritnin e më pas ta qëllonin me sende të forta – thotë policia.

Sipas saj në këtë moment, deputeti Prenga ka nxjerrë pistoletën dhe ka qëlluar në ajër. Po sipas policisë ai është futur mes turmës së njerëzve me shpejtësi dhe është larguar në drejtim të Laçit, pa plagosur njeri.

Deputeti Prenga kthehej nga lokali i vëllait të tij Valentin Prenga, lokal që e disponojnë në lagunën e Patokut dhe në ato momente ka qenë i pashoqëruar. Familja Cali kanë gjithashtu në lagunen e Patokut një lokal të tyre, të cilin e kanë ngritur vite më parë.

Gjatë largimit të Armando Prengës për në Laç, deputeti socialist fillimisht ka njoftuar familjarët e tij,  vëllezërit dhe më pas policinë e Kurbinit që është vënë në lëvizje, duke u nisur për në Patok, ku edhe kishte nisur ngjarja.

Por Gjok Cali, ka trokitur vetë pas pak në polici duke dashur të bënte edhe kallëzimin për deputetin Prenga se ka qëlluar në drejtim  të tyre me armë. Ndërkohë që deputeti Prenga ka mbërritur para komisariatit të Kurbinit së bashku me vëllain e tij Eduart  Prengën dhe Gazmir Jushin.

Pas konfliktit para policisë, familjarët e familjes Cali, kanë qëlluar me thikë 29 vjeçarin Gëzim Jushi, ndërsa i janë sulur me shkop bejsbolli dhe gurë edhe deputetit Prenga – thotë policia.

Sipas saj në këtë momente, Armando Prenga ka nxjerrë pistoletën duke qëlluar në ajër.

Por deputeti ka plagosur Gjok Calin në këmbë.

Gjatë kësaj kohe kanë mbërritur edhe familjarët e familjes Prenga dhe ka nisur edhe përleshja masive, pasi sipas policisë para komisariatit janë mbledhur mbi 40 përsona.

Përleshja ka vijuar edhe përgjatë rrugës së unazës së qytetit dhe rrugës që lidh Laçin me Patokun.

Kanë mbetur të plagosur Gazmir Jushi, Eduart  Prenga, Tom Cali, Gjergj Cali, 55 vjeç, Gjok Cali, Nikoll Cali, dhe Françesk Cali. Të plagosurit fillimisht janë dërguar në spitalin e  Laçit e pas marrjes së ndihmës së parë mjekësore janë trasportuar për tek spitali i traumës në Tiranë, ku edhe kanë marrë mjekimet e  nevojshme.

Ndërkohë që forca të shumta të policisë së Kurbinit të mbështetura edhe nga policia e Lezhës e më pas nga forcat e Ndërhyrjes së shpejtë dhe RENEA, kanë nisur arrestimet.

Është arrestuar deputeti Armando Prenga i cili nuk është larguar nga komisariati i Kurbinit pas ngjarjes dhe më pas janë arrestuar edhe 35 persona të tjerë të cilët vijojnë  të merren në pyetje.

Hetimet

Policia thotë se nga hetimet rezulton se familja Cali ishte parapërgatitur për konfliktin, pasi sipas tyre ka qenë ndërhyrja e deputetit që ka bërë që ata të humbisnin tenderin për të marrë dhe shfrytëzuar lagunën e Patokut.

Por situata ka precipituarr e për pasojë edhe ka nisur edhe konflikti fizik mes palëve të cilët kanë qenë në numër të madh në raport edhe me forcat e policisë së komisariatit të Kurbinit të cilët në ato momente ndodheshin në komisariat.

Deputeti Armando Prenga është dërguar në drejtorinë e policisë së Tiranës ku edhe është marrë në pyetje. Ndërsa personat e shoqëruar në komisaratin e policisë së Kurbinit vijojnë të merren në pyetje në këtë komisariat si dhe në komisariatin e policisë së Lezhës për të shmangur edhe konfliktet mes fiseve.

Zanafilla e konfliktit

Sipas burimeve zyrtare të policisë, fisi Prenga me fisin Cali kanë një vit që kanë nisur konfliktin.

Një vit më parë vëllai i deputetit socialist, Valentin Prenga ka fituar tenderin për shfrytëzimin e lagunës së Patokut.

Në këtë tender ka konkuruar edhe fisi Cali, por që e ka humbur me pesë pikë më pak se vëllai i deputetit socialist.

Gjergj Cali  ka ngritur një padi për agjencinë e prokurimeve që po gjykohet në Gjykatën Administrative në Tiranë. Ndërsa palët nisën fillimisht betejën e denoncimit në media ku Gjergj Cali denoncoi përfshirjen e deputetit socialist.

Ndërsa deputeti Armando Prenga deklaroi se familja Cali janë nipat e ish- deputetes së PD -së për Kurbinin, Pavlina Hoti dhe kërkoi hetimin e marrjes së këtij tenderi nga familja Cali.

Duhet theskuar se familja Cali njihet në zonë si familje që është marrë vazhdimisht me peshkim.

Ndërsa firma e vëllait të deputetit Armando Prenga që fitoi tenderin kishte dy muaj që ishte ngritur.

Të plagosurit

Gazmir Jushi, 39 vjeç banues në Kurbin, plagosur me mjete prerëse dhe të forta, jashtë rrezikut për jetën.

Eduart  Prenga, 36 vjeç banues në Kurbin, plagosur me mjete prerëse dhe të forta jashtë rrezikut për jetën.

Tom Cali, 66 vjeç banues në Fushë Kuqe, i plagosur me armë zjarri jashtë rrezikut për jetën.

Gjergj Cali, 55 vjeç, banues në Fushë Kuqe, i plagosur me mjete të forta jashtë rrezikut për jetën.

Gjok Cali, 51 vjeç, banues në Fushë Kuqe, i plagosur me mjete të forta jashtë rrezikut për jetën.

Nikoll Cali, 53 vjeç, banues në Fushë Kuqe dhe i plagosur me mjete të forta jashtë rrezikut për jetën.

Françesk Cali, 30 vjeç, banues në Fushë Kuqe, i plagosur me mjete të forta

 

 

**********

Ky raportim është mbështetur në informacionet e dhëna nga një gazetar lokal nga Kurbini, A.Bushi botuar në portalin Newsbomb