Komedia e një padie

Sot më datë 10 shtator 2015, Gjykata e Apelit Durrës do të shqyrtojë një padi të gjykatësit Gjin Gjoni dhe bashkëshortes së tij Elonës kundra prokurorisë.

Relatore e çështjes është gjykatësja Meriban Mullaj. Objekti i këtij gjykimi është kundërshtimi i vendimit të prokurorisë së Rrethit Gjyqësor Elbasan për “Pushimin e procedimit penal Nr. 1098 datë 20 prill 2015 dhe ndryshimin e tij me argumentin e përdorur” në raste të tjera të parashikuara nga Ligji 328/1/F të Kodit të Procedurës Penale dhe ndryshimin në “Fakti nuk ekziston” parashikuar nga neni 328/1/A i Kodit të Procedurës Penale, neni 328/1/F – Pushim i cështjes në raste të parashikuara me ligj; neni 328/1/A – Pushim i cështjes, kur fakti nuk ekziston.

Përtej gjuhës së ngarkuar me terma juridikë, në thelb gjyqtari Gjin Gjoni, kërkon, që të hidhet poshtë padia e ILDP-së për fshehje pasurie jo thjesht se janë shkeluar afatet ligjore, por se fakti nuk ekziston. Më troç, gjykatësi në fjalë po kërkon një “certifikatë virgjërie” nga Gjykata e Apelit Durrës.

Komedia e një padie

Si mbërriti deri në këtë finale historia e akuzës mbi pasurinë e pajustifikuar të gjyqtarit të Apelit Tiranë Gjin Gjoni, njëherësh anëtar i Këshillit të Lartë të Drejtësisë?

Në fund të prillit 2014, Inspektorati i Lartë i Deklarimit dhe Kontrollit të Pasurive kallëzon penalisht në Prokurorinë e Përgjithshme, Gjin Gjonin, me akuzën se ka fshehur dhe ka bërë deklarim të rremë të pasurisë. Inspektorati ka ngritur kallëzim penal edhe ndaj bashkëshortes së Gjonit, Elona Çaushi, e cila, në cilësinë e bashkëshortes, ka detyrim ligjor që edhe ajo të deklarojë saktë pasurinë, gjë që nuk e ka bërë.

Në lidhje me falsifikim të dokumenteve dhe bashkëpunim në mashtrim, nën akuzë u vunë edhe noterët Margena Çela e Gentiana Shkodra, të cilat u dyshua se kanë ndihmuar në këtë falsifikim të pasurisë. Mashtrimi është bërë për afërsisht dy milionë euro pasuri, për të cilat ka bërë deklarata të rreme, apo fshehje të burimit. Sipas akuzës, vetëm në hyrje-daljet nga Shqipëria Gjoni ka realizuar 236 udhëtime, me shpenzime afërsisht 250 mijë euro, të padeklaruara kurrë.

Por gjykata e Elbasanit, ku kaloi për gjykim kjo çështje, hodhi poshtë kërkesën e prokurorisë për zgjatje të afateve hetimore. Gjyqtarja Miranda Çekrezi ishte në konflikt interesi, pas Gjoni kishte votuar pro saj në një çështje të tre viteve më herët, pas një vërejtjeje të KLD-së, të apeluar nga gjyqtarja. Ministri Naço kërkoi shkarkimin e saj për këtë “kthim nderi” të hapur.

Prokuroria ndërkohë e apelon këtë vendim të Elbasanit në Apelin e Durrësit. Por edhe kjo gjykatë vendos që Gjoni të mos pezullohet, pra hetimi ndaj tij ngec.

Tani jemi në situatën që gjyqtari i shumëpërfolur kërkon ta fshijë fare nga rekordet zyrtare këtë akuzë, pra që nuk qëndron aspak çështja e pasurisë së dyshimtë të tij. Kjo mbyllje “triumfale” vjen pas sulmit të hapur që Gjoni ndërmori në mbledhjen e fundit të KLD-së korrikun e kaluar, ndaj ministrit të Drejtësisë, në fakt një sulm politik ndaj gjithë mazhorancës./DITA