RAPORTI / Bordet, zyrtarët e lartë miq të ministrave, rroga më të larta edhe se Presidenti e Kryeministri

Sipas një raporti të KLSH anëtarët e disa Bordeve të Institucioneve Shtetërore në Shqipëri marrin paga marramendëse, më të larta se sa vetë Presidenti apo Kryeministri.

Anëtarët mund të jenë pjesë të disa bordeve dhe në jo pak raste, ata marrin paratë edhe kur nuk marrin pjesë në këto mbledhje në shuma që mund të shkojnë edhe 1.6 milion lekë të vjetra për një mbledhje të vetme.

Historia përsëritet si gjatë qeverisjes së djathtë, ashtu edhe asaj të të majtë.

Ligji në fjalë është i pandryshueshëm prej vitesh, e ndërkohë një kastë e caktuar zyrtarësh merr nga 4 e 5 rroga ndërkohë që papunësia rritet.

“Rezultoi një numër i konsiderueshëm punonjësish kryesisht të nivele të larta menaxheriale (Drejtorë Kabineti të Ministrave, Këshilltarë, Sekretarë të Përgjithshëm, Drejtorë të Përgjithshëm, Zëvendës Ministra, Drejtorë të Drejtorive etj) të angazhuar në kohë të pjesshme në cilësinë e kryetarëve/anëtarëve në borde, komisione, këshilla dhe organe të tjera kolegjiale.

Kjo kategori punonjësish përveç pagës në ushtrim të funksioneve te tyre organike, përfiton të ardhura të tjera nga angazhimi në këto struktura kolegjiale, që shkojne nga 2-4 struktura apo edhe më shumë per çdo punonjes, si dhe në disa raste edhe në struktura të sektorit privat, duke perfituar fonde të konsiderueshme në trajtën e shpërblimeve.

Konstatojmë se, në aspektin e performancës në punë dhe kontributit të këtyre punonjësve është realisht e pamundur si kohë fizike dhe jo vetëm kaq, angazhimi njëherazi si në institucionet ku janë të punësuar, ashtu edhe kontributi real në përbërje të bordeve, komisioneve, këshillave apo organeve të tjera kolegjiale” – thotë raporti I KLSH.

Sipas KLSH, këto borde jo vetëm nuk përpiqen të përmirësojnë realisht punën e institucioneve, por janë aq fiktive sa anëtarët nuk marrin pjesë në mbledhje, e megjithatë përfitojnë pagesa që shkojnë nga 60 mijë në 162 mijë lekë të reja për çdo mbledhje që figuron si e tillë në procesverbale.

“Impakti në këto raste është një pjesëmarrje formale, jo funksionale, jo kontribuese, pa efektivitet dhe i vetmi përfitim janë shpërblimet e konsiderueshme monetare vetjake, me pasojë abuzimin me fondet publike.

Nga shqyrtimi i dokumentacionit të vënë në dispozicion, rezultuan pagesa të konsiderueshme të anëtarëve të Këshillave Mbikëqyrës në shoqëritë anonime ndërkohë që këta punonjës nuk kanë marrë pjesë ose kanë marrë pjesë në një numër minimal mbledhjesh, duke sjellë për pasojë absurditete te tilla të pagesave kundrejt mungesës së kontributit, dhe shpërblime për punë që nuk është kryer nga përfituesi, me impakt të drejtpërdrejte abuzim të fondeve publike.

Nga auditimi u konstatuan raste të përfitimit të shpërblimeve të ekzagjeruara për pjesëmarrje në këshillat e bordet, të cilat shkojnë nga 60.000 -162.000 lekë/për mbledhje, në disa raste edhe duke mos marrë pjesë në mbledhje!” – thotë raporti

Raporti i plotë mund të lexohet: KËTU