Kosova bën një hap drejt Bashkimit Evropian, nënshkruan MSA-në

Kosova ka nënshkruar sot marrëveshjen e Stabilizim Asocimit me Bashkimin Evropian. Marrëveshja u nënshkrua në Strasburg midis ministrit të Integrimit Evropian të Kosovës, Bekim Çollaku dhe komisionarit për Fqinjësinë, Johannes Hahn.

“Kam shumë besim se Kosova tani është e gatshme për të marrë përsipër detyrimet dhe të bëjë reformat e nevojshme për të përmbushur kriteret e anëtarësimit në BE. Pa dyshim, si rezultat i kësaj marrëveshjeje, fati i Kosovës dhe i BE-së në të ardhmen do të jetë i lidhur më ngushtë, dhe unë fuqimisht besoj se kjo është një e arritur e madhe, e drejtë dhe plotësisht në përputhje me interesin tonë shtetëror për integrime euro-atlantike”, theksoi ministri kosovar.

Nga ana e tij, komisioneri Hahn tha se MSA-ja është arritje e madhe e Kosovës në rrugëtimin e saj drejt Bashkimit Evropian.

“Është një ditë e madhe për të gjithë ne, duke falënderuar ekipet tona, pa të cilat kjo gjë nuk do të ishte arritur. Mezi pres që të jem në Kosovë javën e ardhshme dhe të çojmë deri në fund atë për të cilën jemi marrë vesh sot dhe të shohim për mundësitë se si ta zbatojmë, sepse tash është koha për zbatim”, u shpreh komisioneri Hahn.

Ai, po ashtu, e falënderoi përfaqësuesen e lartë dhe të gjithë të tjerët, të cilët punuan në muajt e kaluar duke e vlerësuar si një arritje për të gjithë familjen evropiane.

“Është një deklaratë e fuqishme e Kosovës në rrugën drejt Bashkimit Evropian”, theksoi. /Dita/