Premtimi për 300 mijë vende pune, Ahmetaj: Kemi arritur 100 mijë!

Ministri i Ekonomisë Arben Ahmetaj iu rikthye sot premtimit për 300 mijë vende të reja pune, duke deklaruar se shifra 100 mijë ka arritur.

Ministri kishte parasysh këtu vendet e punës të formalizuara dhe këtë e pranoi edhe vetë në fjalimin e mbajtur në Parlament.

“Janë vetëm në dy muaj mbi 100 mijë vende të reja pune, të formalizuara. Patjetër që nuk janë të gjitha vende pune të krijuara rishtazi, por janë vende pune të formalizuara dhe është shumë e rëndësishme që ekonomia kalon nga një fazë në fazën tjetër”, theksoi ai.

Ministri u shpreh se ekonomia po rritet, pavarësisht periudhës së vështirë në të cilën ndodhet rajoni.

Ndërkohë, në një konferencë shtypi, ministri foli për zonën ekonomike në Spitallë të Durrësit që sipas tij do të sjellë 1.5 miliardë dollarë investime. Kjo ishte shuma që ka premtuar kompania kineze në garën për fitimin e tenderit.

“Brenda 30 ditësh do të shpallet fituesi për zonën e Spitallës. Ky është një hap i rëndësishëm pasi janë 1.5 miliardë dollarë të mundshëm që në 9 vitet e ardhshme do të injektohen në ekonominë shqiptare, në industri të ndryshme, me teknologji të lartë. Por mbi të gjitha janë 90 mijë vende të reja pune që do të krijohen për qytetarët shqiptarë”, ka deklaruar Ahmetaj.

Megjithëse vetëm dy kompani shprehën interes, Ahmetaj tha se kjo tregon që kompanitë e huaja janë të interesuara për të investuar në Shqipëri. “Sot kemi oferta sepse kemi incentivë për këtë zonë, që do ta kthejnë në një ndër zonat më konkurrueset në rajon. Kjo është ekonomia reale që ofron mundësi punësimi dhe zhvillimi ekonomik”, ka shtuar Ahmetaj. /Dita/