Fyle: Zgjedhjet që nuk lënë vend për kontestime, sinjal i mirë për integrimin në BE

Konsensusi politik, zgjedhjet e lira dhe të ndershme dhe shmangia e retorikave nacionaliste janë tri porositë që komisioneri Stefan Fyle përsëriti sot në fjalën e tij gjatë konferencës “Just BE”. Fyle tha se është përgjegjësi e të gjitha partive politike, por edhe e shoqërisë civile, që të mbahen zgjedhje që nuk lënë vend për kontestime. Sipas tij, përmbushja e këtij kushti është një sinjal i fortë që Shqipëria i çon BE-së.

“Synimi i Shqipërisë për në BE nuk duhet të bëhet viktimë e politikave të brendshme të partive. Theksoj se është përgjegjësia e të gjitha partive, në qeveri apo opozitë, por edhe e gjithë shoqërisë shqiptare që të kontribuojnë në zgjedhje me standarde dhe që nuk lënë vend për t’u kontestuar. Duke u bërë kjo, Shqipëria çon një sinjal të fortë të pjekurisë dhe gatishmërisë për t’u bërë pjesë e Bashkimit Europian. Ne duam ta sjellim BE gjithnjë e më afër qytetarëve”, tha Fyle.

Më tej, Komisioneri për Zgjerimin theksoi rëndësinë e stabilitetit në rajon, për të cilin tha se Shqipëria ka një rol të rëndësishëm. Fyle tha se është me rëndësi të lihet pas e kaluar dhe të shihet drejt integrimit të përbashkët të vendeve të rajonit në BE. “Integrimi i Shqipërisë në BE, është një element kyç për stabilitetin në rajon. Të lihet pas e kaluara dhe të ecet drejt një të ardhmeje në BE. Është në interesin tonë të përbashkët, duke parë çfarë ka ndodhur në të kaluarën, të shihet e ardhmja në BE. Shqipëria ka një rol shumë të rëndësishëm për të luajtur në stabilitetin në rajon”, tha ai.

Kukan: Zënkat e brendshme nuk duhet të bëhen pengesë për integrimin

Gjatë fjalës së tij në konferencën “Just BE”, eurodeputeti Eduart Kukan u shpreh se zënkat e brendshme mes palëve politike nuk duhet të bëhen pengesë për integrimin. “Zënkat e brendshme dhe politikat partiake nuk duhet të ndërpresin procesin e integrimit. Është e rëndësishme të njohim dhe respektojmë rëndësinë e bashkëpunimit që të tejkalojmë dallimet tona që mund të jenë duke mbajtur peng procesin e integrimit”, u shpreh Kukan.

Fyle dhe Kukan sot në Tiranë, asnjë takim me liderët politikë

Komisioneri për Zgjerimin, Stefan Fyle, dhe kreu i delegacionit të Parlamentit Europian për Ballkanin, Eduard Kukan, ndodhen sot në Tiranë. Dy zyrtarët e lartë europianë nuk kanë parashikuar në axhendat e tyre takime me krerët e politikës shqiptare. Ata do të takohen me përfaqësues të medias, shoqërisë civile dhe biznesit, të interesuar për përparësitë që jep integrimi për sipërmarrjen shqiptare.

Arsyet e shmangies së takimeve me krerët e politikës dhe shtetit duket të jenë mungesa e dialogut mes palëve dhe tonet e larta nacionaliste të kohëve të fundit nga ana e kryeministrit Berisha.

Fyle do të jetë i pranishëm sot në konferencës “Just BE”, ku do të mbajë fjalën kryesore. Ndërkohë, një fjalë përshëndetëse do të mbajnë edhe eurodeputeti Kukan dhe ambasadori i BE-së në Tiranë, Etore Sekui.