INTERVISTA / Klosi: Kumbaro është një personazh kyç, por ka dhe të tjerë…

Ish-shefi i Shërbimit Informativ, Fatos Klosi, në këtë intervistë ekskluzive për gazetën ‘DITA’ i përgjigjet akuzave të Sali Berishës dje në Kuvend.

Çfarë pranoi në të vërtetë Berisha dje për herë të parë dhe kush ishte më shumë i interesuar për zhdukjen e Remzi Hoxhës?

Dhe pyetja: Pse Berisha i pajisi këta punonjës të dyshuar për zhdukjen e Remzi Hoxhës me pasaporta diplomatike dhe pse i ndihmoi që ata të largoheshin nga vendi dhe të humbnin gjurmët, që në vitin 1996?

– Zoti Klosi, në seancën e sotme (të djeshme) parlamentare ish-Kryeministri Sali Berisha ju akuzoi ju se keni zhdukur dosjen e Remzi Hoxhës. Po ta konsiderojmë këtë si të vërtetë, pse e zhdukët dosjen e Remziut, çfarë ju ka interesuar?

– Një gjë më ra në sy që në fillim: për herë të parë Z. Berisha ka deklaruar se ka patur dijeni për dosjen “Hoxha”, pra ai ka gënjyer deri më tani, kur thoshte se s’ka ekzistuar kurrë problemi “Remzi Hoxha”. Nëse unë e kam parë atë dosje dhe e paskam asgjësuar, këtë do ta kem bërë për të “shpëtuar” Berishën dhe të ndjerin Gazidede, që do ta kishin prodhuar atë dosje. Mesa duket Z. Berisha ka ndërruar opinion për “bëmat” e mija.

Një gjë do t’i këshilloja miqve të tij, të përpiqen ta largojnë nga fjalimet e stërzgjatura në Parlament, mosha me sa duket po bën punën e saj dhe dita-ditës do të dëgjojmë broçkulla akoma më të mëdha. Le të përpiqen ta ndihmojnë mikun e tyre.

– Po Berisha pse e bën këtë manovër, duke ju sulmuar ju dhe kur flet me bindje për zhdukjen e dosjes?

– Nuk është për t’u çuditur. Kjo është një taktikë e vjetër e tij, gjithmonë kështu ka vepruar kur ka dashur të shpëtojë nga akuza të vështira, ka akuzuar të tjerë për gjëra më të mëdha, me shpresën se opinioni publik do merret me të tjerët dhe ai do t’ia hedhë kollaj.

– Në të vërtetë, a janë bërë përçapje kur ju ishit shef i Shërbimit Informativ për të zbuluar të vërtetën për Remzi Hoxhën?

– Sigurisht. Sapo mora detyrën tek unë erdhën miq të familjes Hoxha dhe ma pozuan problemin. Menjëherë kontaktuam me Prokurorinë e përgjithshme dhe u ngrit një grup i përbashkët hetimi. Pas disa javësh grupi arriti në përfundimin se Z. Remzi Hoxha kish qenë “i grabitur” nga punonjësit e SHIK-ut dhe stacioni i fundit ku ish parë, ishin mjediset e Shërbimit në Vain të Lezhës. Pastaj informacionet ndërpriteshin pasi të gjithë punonjësit e Shërbimit që ishin të implikuar direkt me problemin, kishin ikur me kohë nga Shqipëria. Z. Berisha asnjëherë nuk e ka thënë pse i pajisi këta punonjës me pasaporta diplomatike dhe pse i ndihmoi që ata të largoheshin nga vendi dhe të humbnin gjurmët, që në vitin 1996.

– Zoti Klosi, u mbushën 20 vjet nga zhdukja e Remzi Hoxhës dhe kohët e fundit ka patur një rigjallërim të debatit edhe nga interesimi që po bëjnë familjarët e tij për gjetjen e eshtrave. A mendoni se duhet të rihapet dosja e asaj çështjeje, edhe pse kanë kaluar kaq shumë vite?

– Dosja e hapur nga Prokuroria për këtë çështje asnjëherë nuk është mbyllur, për sa kohë asnjë nga të implikuarit e rëndësishëm të çështjes nuk erdhi në dorë të drejtësisë. Aktualisht janë kthyer në vend mjaft nga ata që në vitet e largët ’97-’98 kishin ikur, dhe, nëse institucionet e shtetit do të jenë të përgjegjshëm, mund të bëhet një hap i madh në këtë çështje.

– Mendoni se po të sillet Ilir Kumbaro, sikurse tha ministri i Brendshëm, mund të ketë shpresa për zbulimin e së vërtetës dhe të autorëve të krimit?

– Çdo hap në këtë drejtim do të kontribuonte në zgjidhjen e çështjes. Iliri, sigurisht është një personazh kyç, por ka dhe të tjerë, që janë afruar sërish në Shërbim, të cilëve mund t’u kërkohet të kontribuojnë për çështjen në fjalë.

Bisedoi Xh. Shehu