Lunaçek: Vendimi i Gjykatës Kushtetuese duhet pranuar

Zv/Presidentja e Parlamentit Evropian, Ulrike Lunaçek deklaroi sot në Prishtinë se vendimi i Gjykatës Kushtetuese për të pezulluar përkohësisht marrëveshjen mbi Asociacionin e komunave të banuara me shumicë serbe, duhet pranuar.

“Të presim çfarë vendimi do të marrë Kushtetuesja. E nëse vendimi i besohet Komisionit të Venedikut, edhe kjo është një ide e mirë”, tha zonja Lunacek, e cila shtoi se duhet pritur vendimi përfundimtar.

Ajo shtoi se nëse Gjykata kushtetuese vendos se përmbajtja e marrëveshjes nuk është në harmoni me Kushtetutën e Kosovës, atëherë duhet bërë ndryshime.

“Nëse Gjykata Kushtetuese vendos në atë mënyrë, atëherë duhet të ndryshohen ato pjesët e marrëveshjes që nuk janë në harmoni me Kushtetutën. Për mua personalisht, problematike është pjhesa e marrëveshjes në të cilën thuhet se vetëm serbët mund të emërohen në pozita të caktuara. Në një vend shumëkombësh, kjo nuk do të duhej të ndodhte”, ka thënë Lunacek.