Lista Serbe: BE t’i bëjë presion Prishtinës për Asociacionin

Ministri për Komunitete dhe Kthim në qeverinë e Kosovës, Dalibor Jevtiç, ka deklaruar sot se pezullimi i marrëveshjes për Asociacionin e Komunave serbe (AKS) nga Gjykata Kushtetuese e Kosovës, është përpjekje e shqiptarëve për të shtyrë implementimin e saj.

Jevtiç ka rikujtuar se garantues për zbatimin e marrëveshjes së Brukselit është bashkësia ndërkombëtare nga e cila pret të reagojë.

“Mbi të gjitha, këtu bëhet fjalë për besimin që po mundohemi ta ndërtojmë tash e disa vite, për temat për të cilat jemi dakorduar duhen të zbatohen dhe më duket se këtu, para se gjithash, bëhet fjalë për shtyrjen e zbatimit të marrëveshjes për formimin Asociacionit të komunave serbe, marrëveshje kjo më e rëndësishmja për popullin serb në Kosovë”, tha Jevtiç.