Pëson rritje tarifa që duhet të paguajnë të diplomuarit në fusha të ndryshme të mjekësisë apo mësuesisë për të marrë licencën profesionale pas dhënies së provimit të shtetit. Sezoni i radhës është parashikuar të zhvillohet gjatë muajit maj. Kandidatët që do t’i nënshtrohen këtij testimi për herë të dytë do të duhet të paguajnë 12 500 lekë, me 2 500 lekë më shumë nga kostoja e derdhur gjatë sezonit të zhvilluar në muajin nëntor.
Ndërsa kandidatët që kanë dështuar në marrjen e rezultateve kaluese gjatë zhvillimit të këtyre provimeve në dy sezonet e shkuara, për t’i ridhënë këto provime duhet të paguajnë edhe më shumë, përkatësisht 15 000 lekë. Drejtuesit e urdhrave profesionalë të shëndetësisë, si dhe ata të mësuesisë u kërkojnë të diplomuarve që duan t’i japin sërish provimet e shtetit gjatë sezonit të muajit maj, duhet të paraqiten për të bërë regjistrimet përkatëse në mënyrë që të mos mbetën jashtë listës zyrtare që i dërgohen AKP-së ku dhe zhvillohen provimet.
Provimet e shtetit të zhvilluara në dy sezonet e para kanë dëshmuar për rezultatet të dobëta në radhët e farmacistëve dhe infermierëve, ku një pjesë e konsiderueshme e pjesëmarrësve dështuan në marrjen e licencës, pasi nuk morën dot as pikët minimale që të klasifikoheshin kalues.
Studentët e diplomuar në universitetet private manifestuan më së shumti rezultatet e dobëta të arritura në këtë provim. Sipas rregullores së aprovuar, kandidatët që pas tentativave të dhënies së provimit rezultojnë sërish mbetës, ata e humbasin të drejtën për të ushtruar profesionin në të cilin janë diplomuar.