Një person është ndaluar gjatë fluturimit të një avioni të linjës “British Airways” në drejtim të Bostonit, bën të ditur policia amerikane.
Njoftimi është dhënë nga policia e Masaçusetsit nëpërmjet “Tuiterit”, ku thuhet se personi në fjalë, një femër, do të mbahet në arrest.
Por mbetet e paqartë se për çfarë akuzohet gruaja, identiteti i të cilës nuk dihet. Administrata Federale e Aviacionit tha se pasagjerja është përpjekur të largohet nga avioni nëpërmjet një dere.
Dyshohet se ajo po përpiqej të arrinte te kabina. Një zëdhënës i kompanisë ajrore tha se stafi në avion kishte kërkuar ndihmën e policisë për shkak të një “pasagjereje të pabindur” në bord.
Megjithatë, kontrollorët e transmetimeve të trafikut ajror thanë se piloti nuk kishte shpallur gjendjen e emergjencës.