ResPublica ironizon Marinin për lajmin mbi qenin e Sharrit: Kemi një sugjerim për qenin e Tërbaçit

Portali online ResPublica ka ironizuar në rubrikën e tij satirike gazetarin Marin Mema.

“Provën se qeni molos është autokton, madje qen shqiptar, e gjen Marin Mema, i cili edhe qentë i klasifikon si “Gjurmë shqiptare”. Për molosin është shkruar herët, sikurse për qenin e Sharrit, por askush deri më sot nuk i kishte ngarkuar kafshët e ngrata në ndërgjegjen e kombit, as në historinë e tij të lavdishme. Me këtë rast shpresat janë të mëdha: thuhet se baneri i Ismail Morinës do të modifikohet dhe në vend të Malo Vlorës dhe Isës, do vendoset qeni molos dhe poshtë fjala e dashur: Auto… Po kështu ka të dhëna se dronët e parë janë punuar nga zanatçinjtë e qyteteve shqiptare të vjetra, si porosi jaranësh që nuk ia gjenin anën të komunikonin me bukuroshet e heshtura shqiptare” – shkruan ResPublica.

Portali i themeluar nga Mustafa Nano, por që menaxhohet nga gazetarë të tjerë, ka edhe një sugjerim për kolegun e njohur:

“…Sa për qentë dhe autoktoninë e tyre, të na falet një sugjerim modest: edhe qeni i Tërbaçit është autokton. Ai dallohet nga koka dhe fuqia e madhe. Për më shumë, shpresojmë se ky alamet qeni që s’të lë kusur po iu afrove, e sidomos po nuk ishe nga Tërbaçi, do të gjurmohet. Thuhet se shurrën e fundit, apo herën e fundit kur doli jashtë, ndodhej në Qafën e Gjorroçkës, njohur edhe si Qafa e Mirë. Të shpresojmë!”