Buxheti 2016, Cani: Ulen taksat dhe borxhi, Bode: 2.7 mld lekë taksa të reja

Në komisionin e Ekonomisë kanë nisur sot diskutimet për buxhetin e vitit të ardhshëm, ku ka referuar ministri i Financave Shkëlqim Cani.

Ai premtoi se në këtë buxhet do të ulen taksa si dhe do të ketë ulje të borxhit publik. “Është i orientuar në sens rritje reale ekonomie. Kemi rritje të të ardhurave për 93 mije familje dhe ulje taksash. Reforma e taksës zero për biznesin e vogël nxit punësimin. I jep prioritet edhe bujqësisë, pasi janë parashikuar 1.8 mld lekë fond garancie për fermerët. Nga ana tjetër do të rritet edhe fondi për buxhetin vendor, 8 mld lekë më shumë se në 2016. Shpenzimet kapitale për herë të parë ‘përmbysen’, pasi janë parashikuar më te mëdha se shpenzimet korrente : 58% për investime dhe 42% për shpenzime,të ardhurat e bashkive”, sqaroi ai.

Opozita shprehu shqetësimet për uljen e investimeve publike me shifrën e 60 milionë dollarëve. Ish-ministri i Financave, Ridvan Bode tha se ky është buxheti më i ulët për investime që prej vitit 1997.

“Ky buxhet lexohet shumë lehtë nga gjithsecili dhe që në pamjen e parë konfirmon rrënimin e disiplinimit fiskal”, tha Bode, ndërsa shtoi se përpjekja e qeverisë për të injektuar optimizëm duket një betejë e humbur.

“Ky buxhet, ka taksa të reja në një vlerë që shkojnë në 4 miliard lekë dhe duke zbritur 1.3 miliard lekë nga heqja e taksës për biznesin e vogël, mbeten 2.7 miliard lekë taksa të reja që vendosen në vitin 2016. Ajo me të cilën ballafaqohemi sot është raprezalje e qeverisë kundër biznesit për kuponin tatimor. Informaliteti tek biznesi i vogël është shumë më i vogël se sa tek mallrat e akcizës dhe biznesi i madh”, tha deputeti demokrat.

Sipas tij, qeveria planifikon gjobën për kuponin tatimor të barabartë me taksën që paguante për 20 vite së bashku. /Dita/