Berisha: Jam kundër protestave me dhunë, por i fyer nga bunkeri

Në forumin shqiptar për “Liri dhe Demokraci”, ish-kryeministri Sali Berisha e ka cilësuar të drejtë dhe jetike protestën e Partisë Demokratike dy ditë më parë në sheshin “Skënderbej”.

“Vendi qeveriset nga një organizatë kriminale dhe vendi ndodhet në një situatë kritike, – tha Berisha.  Roli i rinisë është jetik dhe ishte ajo që udhëhoqi atë protestë të fuqishme. Unë mendoj që duhet të vendosim me kurajë të madhe për t’u ndarë kjo e keqe e madhe që e ka emrin ‘qeveri’”.

Berisha iu rikthye protestës së opozitës, duke deklaruar se është kundër dhunës në manifestime të tilla, por pohoi se simboli i bunkerit komunist në qendër të Tiranës është një fyerje e madhe.

“Rama festoi 70-vjetorin e LANÇI-t duke shpërndarë fotot e satanit, – theksoi ai duke iu referuar diktatorit Enver Hoxha. – Kjo do të thotë se ai ka nostalgjinë e tyre. Unë jam absolutisht kundër protestave me dhunë, por jam ndier i fyer nga bunkeri, nëse pranojmë bunkerin, duhet të pranojmë statujën e Enver Hoxhës. Rama është njeriu më i rrezikshëm pas Enver Hoxhës, pasi nuk lejon zgjedhje të lira dhe të ndershme. Sa i takon protestës, nuk mund të rrimë pa përdorur të gjitha format paqësore për mosbindje civile për të fituar të drejtat e tyre të dhunuara”.

Më pas Berisha ka përsëritur akuzat e tij ndaj deputetit të Partisë Socialiste Koço Kokëdhima, duke e quajtur atë një njeri “të korruptuar” dhe se  “nuk ka të keqe më të madhe se Kokëdhima.  Beteja ime personale për dinjitet njerëzor”, – shtoi ai.