Dekretet e Nishanit hiqen në momentin e fundit, maxhoranca nuk ka votat

Një ditë më parë, në seancën parlamentare pritej të votoheshin dekretet e presidentit Nishani për emërimin e gjyqtarëve të Gjykatës Kushtetuese dhe asaj të Lartë. Por dekretet presidenciale janë tërhequr nga rendi i ditës në minutën e fundit dhe shkak për këtë është bërë pamundësia e maxhorancës për të realizuar miratimin e tyre. Dekretet për emërimin e Gani Dizdarit në Gjykatën Kushtetuese dhe Xhezair Zaganjorit në Gjykatën e Lartë mund të miratoheshin me shumicë të thjeshtë, por maxhoranca nuk i kishte votat e mjaftueshme. Sipas TV A1 Report, i cili kontaktoi me kreun e grupit parlamentar të LSI-së, Lefter Koka, heqja e dekreteve është bërë për shkak ët mungesës së kuorumit të mjaftueshëm. Por mediat sot shkruajnë se shkak ka qenë pikërisht refuzimi i LSI-së për të votuar dekretet. Ky refuzim mendohet se ka të bëjë me mospërfshirjen në listën e dekreteve që do të hidheshin për miratim edhe të dekretit të mëparshëm të propozuar nga ish-presidenti Bamir Topi për Artan Hoxhën, që rreth një vit më parë u propozuar për anëtar të Gjykatës Kushtetuese në vend të Plarent Plloçit.

Pak ditë më parë, nënkryetari i LSI-së, Petrit Vasili, e cilësoi anormalitet një fakt të tillë.

“Lidhur me mosshqyrtimin e dekretit për gjykatësin Artan Hoxha, ne e vlerësojmë si një anormalitet, sepse çdo dekret i Presidentit ka detyrimin ligjor që të merret në shqyrtim nga Parlamenti dhe ky i fundit mund të shprehet pro apo kundër sipas gjykimit të tij, por ka detyrim ta marrë në shqyrtim dhe të shprehet me votë për të”, u shpreh Vasili në një konferencë të pak ditëve më parë.