Ambasadori rus në Tirane Leonid Grigorieviç Abramov, ka dalë sot në një konference shtypi. “Do ju siguroj se Gazprom është e interesuar që bashkëpunimi me Shqipërinë të jetë i leverdishëm në mënyrë të ndërsjelltë. Ne shpresojmë që nëse qeveria e juaj që do dalë nga zgjedhjet parlamentare të sivjetshme do të mbajë qëndrim konstruktiv ne do jemi të gatshëm të shikojmë mundësinë e pjesëmarrjes në tenderin e Albpetrolit . Në të vërtetë është vendim komercial dhe si diplomat nuk mund të mbaj përgjegjësi për lekët e privatit rus. Ambasada nga ana e vet bën përpjekje se sa më shumë kompani të hynin në tregun shqiptar në kushte sa më pak diskriminuese.. Investitorët rus kanë të interesuar për burimet natyrore të Shqipërisë. Sa i takon turizmit, 3 kompani ruse po shohin edhe mundësinë e linjës së dikurshme Tiranë-Moskë, por më parë duhet investuar për të përforcuar numrin e turistë rus. Interesimi potencial ekziston. Kemi pasur përfaqësues të këtyre kompanive që u njohën me bregdetin shqiptar por investimet si të tillë nuk i kemi. Pengesa politike këtu nuk kemi”, – janë disa nga fjalitë e ambasadorit rus.
Dje, Dhoma Amerikane e Tregtisë kritikoi Berishën për performancë të ulët të qeverisë në raportet me biznesin e huaj dhe Berisha u përgjigj nervoz.
**********
Biznesi i huaj ankohet se qeveria ka vetëm fjalë, jo rezultate. Berisha replikon: Zhvishuni nga pasionet
Duket që Berisha është i vendosur të mos pranojë asnjë shikim tjetër të realitetit të vështirë ekonomik të vendit, vec atij që ka në kokë vetë. Kreu i qeverisë së Shqipërisë u përplas sot me Dhomën Amerikane të Tregtisë (American Chamber of Commerce in Albania) lidhur me klimën e investimeve të huaja në vend, në një takim sot me investitorë të huaj. “Ne do donim të ftonim bizneset amerikane në Shqipëri, për të prezantuar teknologji, shërbime e mallra të reja. Por ne nuk kemi pasur sukses në këtë përpjekje, për shkak të klimës së pafavorshme”, deklaroi përfaqësuesja e DHA. “Kjo deklaratë është e pabazuar në realitetin shqiptar. Shqipëria në vitet e fundit ka marrë investime mbi 1 miliard dollarë. Duhet të zhvishemi nga pasionet dhe të analizojmë me gjakftohtësi situatën. Unë e pranoj se Shqipëria nuk është parajsë, por unë jam këtu pikërisht për ta përmirësuar”, replikoi Berisha. Dhoma Amerikane e Tregtisë i kërkoi kryeministrit Berisha që konsultimi me bizneset të mos mbetet vetëm fjalë. “Unë ju garantoj se zëri juaj dëgjohet, – ishte përgjigja (e pritshme) e Berishës. Një tjetër shqetësim i paraqitur nga anëtarët e Dhomës Amerikane të Tregtisë ishte kontrolli dhe rikontrolli i tatimeve, si dhe gjobat e mëdha të vëna prej këtij organi.