Pesë mijë lekë sallata? Tirana është çmendur

Pas përfundim të Master Chef 3, Renaton e ke më të lehtë ta takosh, por kjo nuk do të thotë se nuk ka angazhime. Pas shumë vitesh qëndrimi në Greqi, ai vendos të kthehet përfundimisht në Tiranë.

Këtu është duke punuar për hapjen e një restoranti, në të cilin do të jetë vetë pronar dhe vetë shef. Na thotë se nuk e pati të thjeshtë ta merrte këtë vendim, duke patur parasysh së në Greqi punonte në një nga restorantet më të mira të Athinës (Vasilainas), në këtë vend mësoi hapat e para të gatimit, ku edhe u nderua me shumë çmime.

Pjesëmarrja në programin televiziv Master Chef, e bëri atë më popullor për publikun në Shqipëri.

Sot, Renato Mekolli është një ndër personazhet më të ndjekur dhe komentuar në rrjetet sociale.

Gjatë prezencës së tij në programin televiziv është përfolur për mënyrën e ashpër me të cilën komunikonte me konkurrentët. Për këtë ai thotë se është e nevojshme të kërkohet llogari për të mirën e të gjithëve, pasi ndryshe, nuk mëson askush.

34-vjeçari nga Fieri, falë punës dhe talentit të tij në kuzhinë është vlerësuar pesë herë me çmimin “Kapelja e Artë”, akorduar nga shefat më të mirë të Greqisë, me mbështetjen e Ministrisë së Kulturës, Turizmit dhe Bashkisë së Athinës. Ai është shqiptari i parë në historinë e këtij çmimi që fiton Kapelen e Artë në një vend të huaj.

Gazeta “New York Times” ka botuar një shkrim të gazetarit të njohur Frank Bruni i cili i dedikohet Renatos. Gazetari specifikon në shkrimin e tij: “Në Athinë gjendet një topchef, një yll i ri i gastronomisë greke, i cili bëri një gatim special për mua”.

Prej 6 vjetësh ai drejtoi restorantin më historik të Athinës “Vasilainas”, një restorant që ka pritur personalitetet më të larta të vendit dhe të huaj. Në një intervistë për Dita-n, Mekolli tregon më shumë për qëndrimin dhe të ardhmen e tij në Tiranë.

-Renato jemi një muaj pas përfundimit të programi televiziv Master Chef, si ka qenë për ty kjo periudhë?

Këtë muaj jam relaksuar pak. Shkova disa ditë në Athinë të takoja familjen time, pasi për shkak të angazhimeve u kam qëndruar larg. Ndërsa tani jam në punim e sipër, mbi përgatitjet për hapjen e një restoranti këtu në Tiranë. Jam gjithashtu i angazhuar edhe në shkollën Albania Gastronomi dhe gjë tjetër që kam në dorë, është një libër me receta gatimi që do të dalë së shpejti në treg.

-Domethënë e keni lënë përfundimisht Greqinë?

E kam lënë përfundimisht. Tani jam vendosur në Tiranë. Ishte një vendim i vështirë për t’u marrë, por duke patur parasysh dashurinë që më ka dhënë publiku këto kohë u detyrova që të kthehesha e të bëja diçka këtu. Mendoj se është moment i duhur për hapjen e restorantit, për nxjerrjen e librit, por edhe për programe të tjera televizive.

-Renato, natën finale të Master Chef, në përshëndetjen e fundit ju thatë: Shihemi në programe të tjera, kjo do të thotë, do të largoheni nga ky program ku qëndruat 3 vite?

Nëse formati do të jetë sërish me pjesëmarrës amatorë në garë, nuk do të doja të isha. Do të doja që të kishte një ndryshim në Master Chef, pasi edhe unë ndihem i lodhur, por edhe publiku do një ndryshim. Jetojmë në një vend të vogël ku gjërat nuk janë ashtu siç duhet të jenë. Ti mund të kesh sukses në një vit, në dy, ja në tre, pastaj bëhesh monoton. Njerëzit lodhen. Duan gjëra të reja. Duke qenë se ata duan gjëra të reja, dua edhe unë të bëj gjëra të reja.

-Po nëse heq dorë nga Master Chef, çfarë mund të bësh tjetër në televizion, e ke menduar?

Sigurisht që e kam të qartë. Ajo gjë që dua të bëj është akoma më e madhe se Master Chef. Mundësit janë, nëse ke pasion, dashuri për punën dhe kanali televiziv të mbështet për idetë e tua, mund të bëhet dhe realizohet mjaft mirë. Për momentin jam në diskutim e sipër. Të shohim. Por ju garantoj se shumë shpejt do kemi lajme të reja dhe besoj në sezonin e ri, shtator-tetor do të kemi diçka konkrete.

-Renato, duket sikur t’i ekrani të do dhe ti ndihesh mirë aty brenda, madje për këtë shkak, shumë thonë që ky djalë përpara se të jetë shef është një showman. Ti vetë, si ndihesh brenda televizionit?

Unë nuk jam prezantues, as gazetar, nuk jam një person i cili jeton me maninë e të qenit në ekran. Mua më pëlqen televizioni, e shfrytëzoj atë për punët e mia. Jam një shef, jam pjesë e botës së restorantit. Ky i fundit është pasioni im, është dashuria ime, pra ky është qëllimi im i parë. Ekrani është një reklamë e fortë e cila të bën më të afërt me publikun. E shfrytëzoj dhe më shfrytëzon, por në fund të fundit, e bëj për të mirën time, nuk e bëj për të mirën e asnjë kanali.

-Por ekrani të bën edhe të famshëm. Gjatë këtyre viteve në Master Chef, e ke ndjerë vëmendjen e njerëzve?

E kam ndjerë. E shoh që edhe njerëzit janë të ngjitur pas meje, ndiqem shumë edhe në rrjetet sociale. Është një gjë e bukur kjo që po më ndodh.

-E ke filluar i vogël karrierën e kuzhinës në Greqi, aty mësove të gatuaje, më pas u bërë shef, je nderuar me një sërë çmimesh, madje ndryshe je quajtur edhe “djali i kapeleve të arta”. Mund të na thuash, çfarë do të këtë ndryshe restoranti që do hapësh ti, nga dhjetëra të tjerë që janë në Tiranë?

Shqipëria dhe Tirana ka nevojë për njerëz profesionistë, ka nevojë për restorante të mirë që të ofrojnë një shije dhe një menu fantastike për ide të reja, njerëz me pasion dhe me dashuri për atë që bëjnë. Sigurisht që ky restorant do të jetë i veçantë, do të ketë show aty brenda, do të jem shumë afër me klientët, si në koncept, si në menu ashtu edhe në ide. Do të ndryshoj herë pas here, sipas nevojave dhe do të japim më të mirën për të gjithë ata njerëz që mezi po e presin hapjen e restorantit. Jam vonuar pak, por kur bëj diçka, dua që çdo gjë të jetë në rregull dhe stafi të jetë gati dhe i kompletuar.

-Kur kemi bërë një intervistë bashkë, dy vite më parë më ke thënë që restorantet në Shqipëri kanë luks, por nuk kanë logjikë. Restoranti juaj do të jetë luksoz?

Në fillim e mendova që do të ishte shumë luksoz dhe vetëm për kategorinë e shtrenjtë, për një klas të lartë. Por gjithë kjo dashuri e publikut më ka bërë që të ndryshoj mendim dhe të hap një restorant që të jetë për masën, për të gjithë njerëzit. Do këtë çmime që mund t’i përballojë kushdo, por do ketë shije, duke qenë ndryshe nga të tjerët. Shumë gjëra do të përgatiten aty, si buka, mishrat e tymosur, makaronat, ëmbëlsirat etj, produktet që do të përdoren do të jenë nga Italia, Greqia, por edhe nga Shqipëria. Do i jap shumë rëndësi cilësisë dhe shijes, por pa ngritur çmimet për klientët. Do ketë çmime normale.

-Janë të shtrenjtë restorantet e Tiranës, sipas teje?

Po, më duken shumë të shtrenjtë. Duan të fitojnë sa më shpejt dhe sa më shumë. Një restorant i mirë do kohën e tij. Nuk mund të bëhesh i pasur nga një restorant dhe nuk mund të nxjerrësh miliona lekë nga një restorant. Mund t’ia arrish me shumë punë që t’u japësh klientëve më të mirën dhe kjo gjë të zgjasë më shumë.

Në Shqipëri, pronarët futen në idetë e shefit dhe shkatërrojnë gjithë punën e madhe që kanë bërë deri aty. Çmimet janë shumë të larta. Vërtetë janë çmimet e produkteve të shtrenjta, por një shef, me zgjuarsi dhe me shijet e tij mund të marrë diçka shumë të lirë dhe ta ofrojë me çmim normal. Nuk mund të japësh një sallatë 4 mijë dhe 5 mijë lekë, të cilën e blen 500 lekë dhe 700 lekë. Si ia jep klientit 5 mijë lekë? Me çfarë logjike e vendos këtë çmim?! Edhe fileto pule t’i vendosësh, nuk shkon aq. Pse duhet të jetë një pasta, që nuk e bën vetë, por e merr të gatshme, 6, 7, 8 mijë lekë?! Që është pasta në fund të fundit dhe gjysmë kilogrami makarona, e dimë shumë mirë që është 1 mijë deri në 1 mijë e 500 lekë. Pse duhet ta ofrojnë 7 mijë lekë?! Ky më duket abuzim.

-Kushtet higjienike janë një tjetër problem…

Pastërtia është shumë problem. Klienti sheh atë që duket, imagjinoni çfarë bëhet mbrapa! Për fat të keq mungojnë njerëzit profesionistë. Çdokush që punon duhet të jetë i ndërgjegjshëm. Njeri është edhe ai që ha, madje ai që ha paguan, dhe ky që paguan nuk i intereson aspak se kush je ti dhe çfarë halli ke, ai do që të hajë pastër, mirë dhe shijshëm. Mos të presë 20 deri 30 minuta për një sallatë apo pasta. Një klient kur vjen duhet të mbetet i kënaqur që të kthehet për herë të dytë e të tretë, vetëm në këtë moment, ti ke arritur suksesin.

-Na the që dje duke punuar për një libër. Janë kthyer në modë librat e kuzhinës…

Jo, për mua nuk është çështje mode. Unë publikun e dua, e kam shumë qejf dhe e falënderoj që më ndjek. Do të jetë një libër për të gjithë njerëzit që kanë qejf gatimin, që nuk janë profesionistë, por që duan diçka ndryshe, në teknikë, në paraqitje dhe në shpejtësi. Libri do të jetë i shpejtë dhe i qartë në recetë, i bukur në paraqitje, por edhe shumë i thjeshtë në përdorim. Do të jetë një libër që do të ketë histori ku do të përfshihen udhëtime nëpër Shqipëri. Një shef duhet të duket që kap domaten, peshkun, kur bisedon me stafin. Do ketë edhe shumë foto. Në të do të zbulohen sekretet e çdo pjate.

-Renato, sa rëndësi të ka dhënë fama dhe sa je joshur ti prej saj?

Shikoni, unë e ndjej vëmendjen që marr kur kaloj në rrugë, e ndjej në rrjetet sociale… Por jam me këmbë në tokë dhe nuk ia lejoj vetes për t’i thënë që, unë jam dhe s’ka tjetër. Jam i njëjti person që kam qenë gjithmonë, me të njëjtën shoqëri, me të njëjtin pasion për punën. Ekrani nuk është ajo që unë kërkoj me çdo kusht, por e shfrytëzoj për punët e mia.

-Gjatë këtyre muajve, ke shkuar në Fier?

E vërteta është se nuk kam shkuar ngaqë kam qenë shumë i angazhuar në Tiranë, por do të shkoj shumë shpejt.

-Familja të ka ndjekur, çfarë të kanë thënë?

Më kanë ndjekur dhe më kritikojnë shumë. Më kritikojnë për mënyrën se si sillem në ekran, në Master Chef. Për arrogancën… Ua kam bërë të qartë. Unë jam ky që jam, jam i rreptë, për të mirën e pjesëmarrësve, për të mirën e tyre, më pëlqen që në fund e vlerësojnë këtë gjë. Ndoshta duhet të jem pak më i qetë, por ky jam unë, nuk mund të jemi të gjithë njësoj. Me veten time luftoj që të jem pak më me takt, pak më i kujdesshëm për mënyrën se si flas, por çdo ditë bëhemi edhe më të mirë.

-Renato, nga fotot që publikon në rrjetet sociale duket sikur bën jetë luksi. Je vazhdimisht në hotele luksoze, udhëton, ushqehesh mirë… Si është në të vërtetë?

Ajo që duket është ashtu siç duket. Por kam edhe atë anën tjetër, kur nuk i jap shumë rëndësi veshjes dhe qëndroj thjesht. Me thënë të drejtën, jam mësuar pak keq. Ndoshta ana ekonomike ma ka lejuar këtë. Kam punuar si shef në një restorant shumë të mirë dhe pagesat i kam patur të mira. Kjo gjë më ka lejuar që të jem ai që njerëzit shohin.

-Na trego diçka për vetën, jetën private. Nuk të është qepur ndonjë vajzë gjatë këtyre kohëve?

E vërteta është se ka patur edhe si këto, por Renato është një tip shumë i çuditshëm. Një tip që kërkon maksimumin, lodhet shumë shpejt. Do gjithmonë ndryshime. Dua lirinë time. Më mbyt xhelozia. Më mbyt kontrolli. Duke qenë se këto gjëra ndodhin, unë nuk mund të jetoj me një person që është xheloz, që më kontrollon gjithandej, që kontrollon telefonin tim…. Nëse unë jam me një person, jam me atë person dhe çdo gjë ka mbaruar. Nëse personi nuk ka besim te kjo gjë, unë e mbyll. Për momentin jam në atë fazë që, edhe jam edhe s’jam me dikë.

Intervistoi Entela Resuli