Dhjetëra avokatë do të bojkotojnë punën e tyre ditën e hënë. Ata protestojnë kundër ligjit të qeverisë për përcaktimin e pagës mujore të tyre si nivel taban për pagesat e sigurimeve shoqërore.
Bëhet fjalë për ligjin për profesionet e lira.
Në njoftimin e saj Dhoma Kombëtare e Avokatisë sqaron se nuk do ti nënshtrohen bojkotit vetëm seancat që do të zhvillohen lidhur me masat e sigurimit personal.
Këshilli Drejtues i DHKA në mënyrë unanime vendosi :
1- Dita e Hënë, datë 8 Shkurt 2016 të të bojkotohen në rang vëndi të gjitha proçeset hetimore dhe gjyqësore, në çdo nivel gjykimi.
2. Dita e bojkotit do të jetë vetëm fillimi i një proçesi që do të zgjatet në varësi të reflektimit të shtetit.
3. Nuk do ti nënshtrohen bojoktit vetëm seancat që do të zhvillohen lidhur me masat e sigurimit personal.
4. Avokatët duhet të marin masa për njoftimin e klientëve të tyre për të marë masat për përfaqësim individual në gjykata dhe për të kërkuar shtyrjen e seancave të kësaj dite.
5. Avokatët që do të veprojnë në kundërshtim me këtë vendim bojkoti, konsiderohen në shkelje të rëndë të ligjit nr. 9109 datë 17.07.2003 “Për profesionin e avokatit në Republikën e Shqipërisë”, i ndryshuar, statutit dhe Kodit Etik të Avokatit dhe për rjedhojë do t’i nënshtrohen proçedimit disiplinor.
Ministri i Drejtësisë, Ylli Manjani reagoi menjëherë për grevën e paralajmëruar, duke u bërë thirrje avokatëve që të mos braktisin detyrën. “Avokatët e shërbimit ligjor falas duhet të jenë disponibël për shërbimin”, thuhet në deklaratën e ministrit. /Dita/