FRD-AK pranë marrëveshjes për koalicionin e “Polit të Tretë”

Zhvillimet e fundit politike kanë detyruar edhe partitë e Bamir Topit dhe Kreshnik Spahiut të ndryshojnë strategjinë elektorale duke nisur të diskutojnë për hyrjen në zgjedhje në një koalicion të përbashkët. Gjatë ditës së djeshme ish-presidenti dhe ish-nën kryetari i KLD-së kanë qëndruar së bashku në një nga baret e Tiranës për të diskutuar formën e bashkëpunimit. Burime nga takimi për gazetën “DITA” bëjnë me dije se Topi dhe Spahiu kanë nisur seriozisht formimin e Polit të Tretë që tashmë iu takon atyre pas futjes së LSI në koalicion me Partinë Socialiste. Sipas të njëjtave burime bëhet me dije se është rënë dakord që AK dhe FRD do të jenë së bashku në zgjedhjet e 23 qershorit dhe do të tentojnë të afrojnë sa më shumë parti. Afrimi i FRD-së me AK-në heq mundësinë që Vangjel Dule të futet në koalicion me Topin çka do t’i prishë punë partisë së ish-presidentit për ruajtjen e votave pasi nuk ka komisionerë.

Poli i Tretë

Ajo që mësohet nga FRD dhe AK është fakti se Kreshnik Spahiu është  takuar me disa nga kryetarët e partive aleate të Partisë Socialiste të cilët janë të zhgënjyer me koalicionin PS-LSI. Spahiu ka zhvilluar takim me Skënder Gjinushin, Paskal Milon, Petro Koçin dhe Preç Zogajn. Tema e diskutimit ka qenë futja në zgjedhje në një koalicion që të jetë mes PD dhe PS. Krerët e partive të majta ende s’kanë vendosur pasi kanë kërkuar kohë që të bëjnë paraprakisht edhe një takim me Edi Ramën për të parë mundësinë e gjetjes së gjuhës së përbashkët. Konfirmimin për krijimin e Polit të Tretë e jep dhe funksionari i lartë i FRD-së Afrim Krasniqi. I kontaktuar nga “DITA” Krasniqi thotë se aleanca e re do jetë mbi të gjitha një koalicion vlerash për të kundërshtuar politikën aktuale. “Për 1000 arsye sot është koha për një front politik, civil, qytetar kundër sistemit abuziv, korruptiv, kërcënues, fyes, amoral dhe personal të Sali Berishës, Edi Ramës dhe Ilir Metës. Është koha për Polin e Tretë, koha për akte e veprime konkrete. Për t’i dhënë shans atyre që shohin fatin e shtetit dhe demokracisë tej karrigeve personale të këtyre 3 individëve; për të ofruar një alternativë mbi vlera morale, qytetare; për të rikthyer shpresën se ky vend mund të bëhet dhe se jo gjithçka është e baltosur dhe e pashpresë; për të krijuar garancinë politike se më 24 qershor asnjëra palë e vjetër nuk merr 71 vota dhe se qeverisja e ardhshme e vendit do të mund të arrihet jashtë axhendës/modelit personal të Sali Berishës, Ilir Metës, Edi Ramës dhe llojeve të tjera të njëjta të tranzicionit”, u shpreh Krasniqi.

***

Topi: te hapur për Polin e Tretë

Kreu i FRD-së, Bamir Topi, ka thënë gjatë një komunikimi me gazetarët, se partia e tij është e hapur për krijimin e një “Poli të Tretë”. Ai ka thënë se FRD nuk e përjashton mundësinë e një koalicioni të mundshëm me AK-në dhe PBDNJ-në.

“Ne nuk bëjmë përcaktime nominale, jemi të hapur të bisedojmë për aq kohë sa ka mbetur. Në rast se partitë e tjera nuk i shohin interesat e tyre të njëjta me ato te FRD-së, ne jemi të vendosur të dalim të vetëm në zgjedhje. Nuk mund t’i japim oksigjen një kryeministri dhe një qeverie që ka braktisur interesat e të djathtës .Pasqyrë e degjenerimit të politikës ishte dje miratimi i ministrave të rinj. Kjo mundësi konsiderohet e hapur përsa kohë të ketë parti që mbështesin pozicionin dhe qëndrimin e FRD-së. Nëse nuk gjenden pikat e përbashkëta, FRD do të konkurojë e vetme me modelin e saj në shërbim të shtetit dhe qytetarit”, tha Topi.

Megjithatë, një koalicion i përbashkët me AK-në dhe PBDNJ-në do jetë pothuajse i pamundur, duke parë qëndrimet e kundërta dhe gati armiqësore të këtyre dy partive ndaj njëra-tjetrës.

Topi ka thënë se pas 23 qershorit asnjë parti nuk do jetë e aftë që të krijojë e vetme qeverinë, kështu që i takon FRD-së dhe aleatëve të saj që të përcaktojnë modelin qeverisës.

“Asnjë marrëveshje numrash dhe personash, asnjë pazar për blerje votash parlamentare apo përcaktimin paraprak të vullnetit popullor elektoral nuk do të ketë sukses. Më 23 qershor asnjëra palë politike, nuk do të arrijë të qeverisë e vetme dhe kështu, i takon Frymës së Re Demokratike dhe aleatëve të saj misioni historik të përcaktojnë modelin qeverisës të së ardhshmes”, u shpreh Topi.