Izet Haxhia: Mars ’97, me porosi të kujt vumë bombën te zyrat e ‘Sorosit’

Njeriu që njihet si “krahu i shoqërisë civile” të PD-së, me herët me detyrë në bashkinë e Tiranës së Bashës, Altin Goxhaj, ka bërë dje një koment që lidh zemërimin e Izet Haxhisë për përmendjen e emrit të tij në Kuvend, me një “komplot më të gjerë”. Kjo ka sjellë reahimin ish truprojës së Berishës në DITA.

Reagimi

Lexova diku se njëfarë Altın Goxhaj kishte bërë ‘zbulimin’ se përse është kërcënuar Saleh Berisha nga ana ime. Sipas këtij aktivisti të OJQ që hidhet sa në një prehër politikani tek një prehër tjetër, unë e paskam kërcënuar Salehun, sepse qenkan paguar nga Sorosi, ngaqë Salehu i ka zbuluar lidhjet korruptive me njerëzit e tij në qeverinë e sotme. Pika që nuk të bie, mor këlyshi i sigurimsit të shtetit! Po pse mundohesh të garosh me Salehun në shpifje e trillime, sepse nuk ia kalon dot atij. Ai është i vetmi në llojin ish sigurimsave që nuk ia lëshon vendin e parë askujt për shpifje e trillime, as ty që je i biri i një sigurimsi famëkeq. Babai jot ka qenë drejtori i arshivës së Sigurimit të Shtetit dhe pyete njëherë për dosjen e atij që i shërben sot duke shpifur marrëzira të tilla. Prindërit e mij të thjeshtë e të ndershëm më kanë edukuar të mos gënjej kurrë, të mos shpif, të mos vjedh, te jem i ndershëm e besnik. Ndërsa ti, kuptohet që ke marrë shumë nga zanati i babait tënd prej sigurimsi. Nuk e njof as Sorosin as soroistat. Por dua të kujtoj ty dhe Salehut se me porosi të tij kemi vendosur bombën në ndërtesën e këtij fondacioni në mars të ’97-s, sepse ky, sipas Salehut, po financonte rebelimin e kuq dhe gazetën e këtij rebelimi, “Koha jonë”. Kaq për sonte.

INTERVISTA në DITA

Zagarët lehin me urdhër të të zotit…

– Izet, ju sot kini replikuar në distancë me avokatin Altin Goxhaj. Po unë dua të të pyes: Çfarë ka personalisht me ty ky Goxhaj? Pse të turret ty?

– Po si duket ka ngelur pa kockat që ndan Sorosi në Shqipëri për OJQ-të. Me mua nuk ka përse të ketë diçka personale, se nuk e kam rrafur ndonjëherë në ato kohët e drurit, por, me sa duket kërkon të bëhet interesant me ato që shpif, por mundësia më e madhe është që ai ka marrë direktivë nga Salehu. Të shpifësh gjëra të tilla, sikur unë qenkam paguar nga Sorosi për të bërë atë e këtë, tregon gjendjen e mjeruar e groteske se ku ka rënë Salehu me tellallët e tij të marrë. Unë as nuk jam shitur e as më blen dot askush. Për më tepër, nuk pranoj të bëj tellallin e askujt. Po të isha i tillë do të isha në stanin kriminal të Berishës akoma. Për mua, qenia i pavarur është e shenjtë.

– Mirëpo gjallërimi i tij, apo shfaqja e tij (pra Goxhajt) mendon se është e rastësishme në këto momente? Ky avokat mund të gjente shumë çështje të tjera për të mbrojtur aktualisht dhe jo të sulmonte Izet Haxhinë…

– Kjo nuk më çudit. Jetojmë në kohën e marrëzirave e mashtrimit. Unë nuk kam pasur ndonjë problem personal që të më sulmojë, por as rastësi nuk më duket që ky të bëjë avokatin e djallit Berisha. Vërtet është për të qeshur se sa poshtë ka rënë djalli Berisha dhe çfarë mbrojtjeje është duke i bërë ky pinjoll sigurimi. Por amaneti i të parëve sigurimsa i thërret të bashkohen në profesionin e shpifjes e mashtrimit që, të mos ua hamë hakun, e bëjnë me mjaft zell e pasion. Por të shpifësh në mënyrë kaq të trashë, tregon se ata janë të pafuqishëm t’u përgjigjen akuzave të mia, as me shpifje biles…

– Sidoqoftë, Izet, këto akuza a ju shqetësojnë ndopak? Domethënë a lëkundeni ndopak nga ato që kini thënë kundër Berishës dhe vijës kriminale në politikën shqiptare?

– Jo aspak. Do doja që për ato të vërteta që kam rrëfyer të m’i hidhnin poshtë me argumente e fakte, por jo të merreshin me shpifje të tilla alla sigurim e të modelit serb. Jam gati të ballafaqohem me cilindo për ato që kam thënë. Nuk më intereson as e majta as e djathta sepse për mua janë njësoj. As Sorosi dhe as misionerët e tij të shumtë në Shqipëri nuk më interesojnë. Më intereson vetëm e vërteta dhe do ta them e mbroj me çdo çmim dhe pa e shitur me asnjë çmim.

– Çfarë përfaqëson aktualisht Altini avokat në këtë sulm që ndërmerr kundër jush?

– Aq shumë zagarë ka Salehu sa çdo ditë bëjnë ndotjen akustike të ambientit po aq të ndotur politik e mediatik në Shqipëri. Si duket, sa herë që i shterohet zëri lehësit më të madh Saleh Berisha që për koincidencë edhe shqiptimi i emrit te tij arab është saleh… Prandaj ky kryelehës bën çdo gjë që ta meritojë këtë shqiptim të emrit…

Bisedoi Xhevdet Shehu