Qeveria: Tenderi për uniformat e policisë i hapur dhe transparent

Kryeministria reagoi në lidhje me akuzat e opozitës për korrupsion në tenderin për Uniformat e Policisë duke theksuar se procesi është bërë në mënyrë transparente.

Në faqen Transparenca.al, Kryeministria thekson se ndryshe nga pretendimet e Partisë Demokratike, Drejtoria e Policisë së Shtetit ka ngritur një grup pune të posaçëm, i cili hartoi specifikimet teknike për uniformat e reja të policisë duke u bazuar mbi ligjin përkatës.

“Grupi i punës, i ngarkuar për hartimin e specifikimeve teknike, hartoi gjithashtu  modelin dhe cilësinë e materialit të uniformës. Ndërkohë që Drejtoria e Prokurimeve të Përqendruara administron fletë-analizat e Laboratorit Fiziko-Mekaniko-Kimik pranë Universitetit Politeknik të Tiranës, si dhe mostrat dhe modelet për materialet të cilat ishin në përputhje me specifikimet e caktuara nga grupi i punës”, thekson reagimi.

Për sa i përket zhvillimit të tenderit, reagimi i qeverisë thotë se më datë 6 nëntor të vitit 2015, Ministria e Brendshme ka hapur prokurimin për uniformat e reja.

Në garën për uniformat e reja të Policisë së Shtetit, e cila u mbyll në datën 01.12.2015, u paraqitën 4 ofertues:

1.    GJERGJEFI – me ofertë  111.418.250 lekë;
   2.    DSE & Alfredo Grassi SPA – pa ofertë;
   3.    Bashkimi i operatorëve “YAKUPOGLU TEKSTIL VE DERI SAN.TIC.AS” & Marsi AL SHPK – me ofertë 91.917.500 lekë;
   4.    PAERA SHPK – pa ofertë.

Sipas qeverisë, fituesi i shpallur në datën 23.12.2015, ishte bashkimi i operatorëve “YAKUPOGLU TEKSTIL VE DERI SAN.TIC.AS & Marsi AL SHPK”, me çmimin më të ulët ndër ofertuesit. “Kompania fituese u shpall pa shkelur asnjë procedurë, menjëherë pas vlerësimit të ofertave dhe pa pasur asnjë ankesë nga firmat pjesëmarrëse në tender”, thuhet në reagim.

Për qeverinë, gara ishte e hapur dhe nuk ishte e paracaktuar. /Dita/