Gjykata e Shkodrës la dje në burg 76-vjeçarin e cili akuzohet se vrau në fundjavë fqinjin e tij, të cilin e pandehu për grabitës.
Avokati i Ndok Veçajt kundërshtoi vendimin, duke e mbrojtur me argumentin se “klienti i tij e ka pyetur personin se kush është, por viktima ka vazhduar të ecë nëpër oborr pa u përgjigjur”.
Edhe Veçaj gjatë dëshmisë së dhënë në prokurori ka thënë se e bëri për vetëmbrojtje pasi kujtoi se kishte hyrë grabitësi në shtëpi.
“E pyeti tre herë kush je, por nuk mori asnjë përgjigje. Pas kësaj qëlloi me çifte në ajër dy herë dhe më pas në drejtim të personit në errësirë, i futur brenda rrethimit të shtëpisë”, tha avokati para gjyqtarit të gatshëm.
Viktima ishte fqinji 55-vjeçar, Nikë Bungu, i cili vuante njëkohësisht edhe nga shëndeti mendor.
Por gjykata pasi dëgjoi palët, vendosi që për momentin i moshuari nga Shtoji i Vjetër të qëndrojë në burg. Mbetet i paqartë shkaku përse viktima ishte futur në oborrin e fqinjit të tij dhe nuk i është përgjigjur kur e ka pyetur se kush ishte.
Avokati u shpreh se do të apelojë masën e gjykatës në shkallën e dytë, ku do kërkojë lehtësim dhe lirim të të moshuarit.
Kurse prokurorja Edlira Cufi tha se në vendin e ngjarjes u gjetën 4 gëzhoja dhe viktima kishte 2 plumba në trup, në bark dhe dorë.