“Ja çfarë i vodha Sali Berishës”

Në një rrëfim për “Anketën Muzikore” në Televizionin Publik Shqiptar, Arben Duka tregon se edhe “i ka vjedhur” Berishës.

Nuk bëhet fjalë për sende materiale, por për idenë e një vargu, që më pas u kthye nga më të njohurit. Poeti Duka kujton momentin kur shkroi këngën “Gjirokastra ime” të kënduar nga Petrit Lulo, ide që sipas tij, ia ka vjedhur pikërisht Sali Berishës.

“Unë kam këngë të ndryshme popullore që kanë mbetur. Bën vaki që në një dasmë mund të dëgjosh 10 këngë që kanë tekstin tim. Një ato më të bukurat është “Po the Gjirokastër, i ke thënë të tëra”. Ky është një nga vargjet që kanë mbetur dhe këndohet kudo. Për humor do të them se ku e kam marrë si spunto. Unë këtë e kam marrë nga Berisha si ide. Berisha tha në Korçë : “Po të deshi Korça, të do gjithë Shqipëria”. Dhe unë kur po shkruaja për Gjirokastrën, thashë “Po the Gjirokastër, i ke thënë të tëra”, u shpreh Duka.

Poeti shprehet se në ’96 i kanë djegur një libër.

“Mua më kanë djegur një libër të gjithë në vitin 1996. Nuk po përmend ndonjë emër, por më thanë po qenë veç e veç, nuk bëjnë ndonjë dëm, por po u bënë në një libër bashkë, ato shpërthejnë  si një bombë. Censura kjo është”, shprehet Duka.

Duka shprehet se nuk ka menduar asnjëherë që të tërhiqet nga kjo lloj poezie.

“Sot për sot unë jam fatkeqësisht ose fatmirësisht poeti më i lexuar, pasi shkruaj në një gazetë të përditshme, DITA, që ka një tirazh shumë të madh. Përditë… Kjo ndonjëherë është edhe pozitive edhe negative. Por kini parasysh që të shkruani çdo ditë sa vetëm një krijues e kupton, konsumimin, të mbash lexuesin afër. Kështu që unë jo çdo ditë shkruaj satirë te Dita, por 3-4 herë e thyej me ndonjë baladë. Kjo lloj kategorie ka lexuesit e saj, por më shumë janë ata të satirës”, – shprehet Duka.

Duka nuk heziton që ta cilësojë veten “të pasur”. Por nga ana shpirtërore:

“Sa të jem gjallë do shkruaj. Jam me popullin. Nga ana shpirtërore kam pasuri dhe nuk ka arsye pse të mos jem krenar me veten. Unë s’i kam bërë kurrë hile krijimtarisë. Kam krijuar me shumë përkushtim”, – rrëfen poeti i njohur.