“Derbi është një sfidë e rëndësishme, një ndeshje që duhet të konsiderohet si festë për kryeqytetin”. Me këtë deklaratë të klubit të Tiranës ka nisur konferenca për shtyp e trajnerit Ilir Daja në prag të sfidës me Partizanin.
Në sinkron është edhe timonieri i bardhebluve që kërkon qytetari nga tifozët, në një sfidë që për futbollin e luajtur mbetet e vështirë të parashikohet. “Si qytetar, por edhe si prind i bashkohem thirrjes së klubit për ndeshjen. Shpresoj që tifozët të menaxhojnë situatën si duhet. Ndeshjet derbi kanë koeficient të lartë vështirësie.
Derbi është i paparashikueshëm. Duhet të menaxhojmë presionin e derbi dhe motivimi në të tilla ndeshje është maksimal. Stresin dhe ngarkesën shpresojmë ta kthejmë në pozitive”, shprehet tekniku i bardhebluve.
Tirana nuk fiton derbin prej 7 sfidash, ku ka regjistruar 4 barazime dhe 3 humbje. Për trajnerin e 24 herë kampionëve të vendit çdo ndeshje ka historinë e vet dhe shifrat nuk vlejnë. “Mua nuk më pëlqen historia, sepse po të marrim kampionatet Tirana del përpara. Çdo trajner apo futbollist edhe sikur të ketë fituar 10 derbi do kërkojë të fitojë të radhës. Ndeshjet derbi nuk i ngjajnë njëra-tjetrës dhe gjithçka do t’ia lëmë fushës”, tha Daja.
Te Tirana mungesat kanë qenë një problem i madh në ndeshjet e fundit. Elis Bakaj dhe Erjon Vucaj janë rikthyer me grupin, por për trajnerin Ilir Daja mungesa më e rëndësishme është ajo e Gentian Muçës: “Bakaj dhe Vucaj janë rikthyer, por problemi më i madh është mungesa e Muçës, çka ka bërë që të ndryshojmë edhe modulin e lojës.
Megjithatë do të kemi më shumë alternativa cilësore në stol. E dimë që nuk kemi sulmues të mirëfilltë, por nuk duhet të fshihemi me këtë justifikim. Duhet të gjejmë alternativën e duhur për të sulmuar”.
Në fazën e dytë skuadrat dhuruan një ndeshje të luftuar taktikisht, por me pak raste për shënim. Timonieri 49-vjeçar i bardhebluve tregon shembuj realë kur sfidat e mëdha nuk prodhojnë atë që pritet, edhe pse shpreson që kësaj radhe gjërat të jenë ndryshe.
“Edhe sfida Napoli-Juventus ishte e shëmtuar, por ajo që dua të them është se do të shohim një ndeshje të luftuar. Nëse rezultati zhbllokohet që në fillim atëherë do të kemi një derbi të bukur. Do të fokusohemi për një paraqitje të mirë për tifozët. Derbi duhet fituar. Shpresojmë të fitojmë dhe të ngushtojmë diferencën me Partizanin pastaj të shohim deri në fund”, deklaroi trajneri i Tiranës, Ilir Daja, i cili në fund pati një urim për të cilin shpreson të jetë ogur i mirë për derbin: “Uroj Ervin Bulkun për ditëlindjen, të ketë ditë sa më të mira dhe le të jetë ky një ogur i mirë për derbin!”.