Kryetari i Kuvendit Ilir Meta priti sot Zëdhënësin e fraksionit parlamentar CSU në Bundestag, njëkohësisht anëtar i Komisionit të Mbrojtjes Florian Hahn me të cilin vlerësuan bashkëpunimin e shkëlqyer mes Shqipërisë dhe Gjermanisë dhe diskutuan mbi ecurinë e procesit të integrimit evropian të vendit, duke u ndalur në veçanti tek reformimi i sistemit të drejtësisë, si një nevojshmëri imediate për progresin e vendit drejt anëtarësimit në Bashkimin Evropian.
“Ndamë pikëpamje të përbashkëta në përballimin e shumë sfidave të rëndësishme që kanë të bëjnë me perspektivën europiane të vendit tonë, sidomos me reformat si ajo në drejtësi, ku Gjermania është e përfshirë me mbështetjen e saj të spikatur në kuadër të misionit EURALIU-s”, tha Meta.
Miratimi i kësaj reforme, theksoi kreu i Kuvendit, do të jetë një argument shumë i rëndësishëm për të ecur drejt çeljes së negociatave me BE-në, por dhe për të përmirësuar klimën e biznesit dhe për të tërhequr më shumë investime të huaja, përfshi ato gjermane.
Dy zyrtarët diskutuan gjithashtu dhe për situatën në rajon, për forcimin e bashkëpunimit rajonal, por edhe të vendeve tona me BE-në në kuadër të përballimit të sfidave të reja, sikurse është kriza e refugjatëve, që është një shqetësim serioz që ka të bëjë me stabilitetin e rajonit tonë, por dhe të vlerave të BE-së.
Zyrtari i Bundestagut nga ana e tij tha se Gjermania po e ndjek dhe e mbështet Shqipërinë në rrugën e saj të reformave të domosdoshme në procesin e integrimit, ku veçoi reformën në drejtësi.
Shqipëria është shumë e rëndësishme për ne në rajon, theksoi Haan, ajo është faktor stabiliteti dhe për këtë ju jemi shumë mirënjohës. Duam të punojmë më shumë së bashku sa i takon krizës së refugjatëve, por dhe në aspektin ekonomik, sepse për Shqipërinë është e rëndësishme të ketë investime, që të ketë më shumë punë për njerëzit, këtu në Shqipëri, ndaj do ta mbështesim bashkëpunimin mes kompanive shqiptare dhe atyre gjermane, theksoi Hahn.