Me kërkesë të Prokurorisë së Durrësit, gjykata ka vendosur masën ndaluese “pezullim nga detyra” për drejtoreshën e spitalit rajonal, Ardjola Frashëri, e dyshuar për konsumimin e elementeve të veprave penale të “shpërdorimit të detyrës” dhe “shkeljes së barazisë në tendera”.
Prokuroria e Durrësit ka nisur hetimin në bazë të kallëzimit të Kontrollit të Lartë të Shtetit, i cili ka audituar veprimtarinë ekonomike të Spitalit Rajonal të Durrësit për periudhën 2013-2015.
Nga hetimet e Prokurorisë ka rezultuar se, në të paktën 23 raste, drejtoresha Frashëri, si edhe ish-drejtori Taulant Baku, i cili gjithashtu është nën hetim, kanë urdhëruar kryerjen e prokurimit publik me procedurën e “negocimit pa njoftim paraprak”.
Në bazë të ligjit “Për prokurimin publik”, kjo procedurë aplikohet vetëm në raste emergjente.
Nga hetimi i deritanishëm i Prokurorisë së Durrësit, rezulton se prokurimet publike me negocim pa njoftim janë kryer në shkelje të ligjit, për faktin se nuk ka pasur asnjë arsyetim për kushtet e emergjencës.
Nga hetimet e deritanishme, Prokuroria e Durrësit konsideron si shkelje ligjore procedurat e prokurimit publik për mallra dhe shërbime, si: Blerje nafte, shërbim kateringu, shërbim ruajtje civile, riparim pavijonesh, blerje materiale pastrimi, si edhe për blerje medikamentesh dhe materialesh mjekësore.
Në vijim të hetimit, Prokuroria e Durrësit do të analizojë dëmin e shkaktuar nga procedurat e dyshuara si të zhvilluara në kundërshtim me ligjin.
Sipas raportit të Kontrollit të Lartë të Shtetit, dëmi ekonomik llogaritet në vlerën e rreth 70 milionë lekëve.
Pasi ka marrë vendimin e gjykatës për pezullim nga detyra të drejtoreshës Ardjola Frashëri, Prokuroria e Durrësit ia ka dërguar për zbatim Ministrisë së Shëndetësisë.
Ndërkohë, për ish-drejtorin Taulant Baku, nuk është kërkuar masë ndaluese, për faktin se ai nuk është në funksion publik.
Sipas prokurorisë, hetimet ndaj dy ish-drejtuesve të spitalit të Durrësit do të përqendrohen te shkeljet e evidentuara nga raporti i Kontrollit të Lartë të Shtetit, por jashtë vëmendjes nuk do të lihen as shkelje të mundshme të tjera në rast se do të konstatohen.
Në CV-në e publikuar nga drejtoresha në faqen e spitalit, thuhet: “Ka mbi 17 vjet punë në poste drejtuese dhe menaxheriale në banka dhe kompani prestigjoze në tregun shqiptar. Zotëron aftësi shumë të mira drejtuese dhe të punës në grup. Shquhet për aftësi të shkëlqyera operacionale, në drejtimin e skuadrave të ndryshme profesionale. Që prej janarit 2014 i është bashkuar stafit të Spitalit Rajonal të Durrësit, në postin e drejtores së përgjithshme”.
“Znj. Frashëri udhëhiqet nga parimi: “Një drejtues i suksesshëm është më parë një menaxher i mirë”,” mbyllet CV e saj.