Rifilluan në Lesbos protestat kundër dërgimit të emigrantëve nga Greqia drejt Turqisë, sipas një marrëveshjeje mes Bashkimit Evropian dhe Ankarasë.
Disa protestues janë hedhur në det, përpara portit të Lesbosit, në përpjekje për të penguar nisjen e anijeve të mbushura me refugjatë.
Në bordin e njërës prej tyre ka refugjatë pakistanezë, që sipas autoriteteve nuk kishin paraqitur kërkesa për azil.
Pas dërgimit të 202 personave ditën e hënë, operacionet ishin pezulluar.
Ndërkohë, një grup prej dhjetëra refugjatësh, i përbërë nga fëmijë dhe gra arritën të kalonin kordonin e policisë greke, që ndodhet rreth 200 metra larg gardhit me tela të ndërtuar nga ushtria maqedonase.
Emigrantët në këtë zonë protestonin kundër mbylljes së hekurudhës ndërkombëtare që lidh Maqedoninë me Greqinë.
Grupi, i cili arriti të kalonte kordonin e policisë vendosi tenda dhe u ul në afërsi të gardhit me tela, mirëpo situata u përshkallëzua në momentin kur qindra refugjatë të tjerë u përpoqën t’i bashkohen grupit të grave dhe fëmijëve.
Policia greke, për të parandaluar afrimin e refugjatëve në gardhin me tela, përdori edhe forcën.
Në gjithë territorin e Greqisë ndodhen mbi 50 mijë refugjatë, ndërsa vetëm në kampin e refugjatëve në Idomeni ndodhen rreth 12 mijë.