25-vjetori i Parlamentit pluralist është përkujtuar këtë të hënë përmes një ceremonie në ambjentet e këtij institucioni.
Në fjalën e tij, kryetari aktual i Parlamentit, Ilir Meta ka deklaruar se, Shqipëria ka ndryshuar mjaftueshëm në këto 25 vjet dhe jo vetëm nga aspekti politik.
“Shqipëria është sot një vend i respektuar në arenën ndërkombëtare, por shumë mbetet për të bërë për të garantuar një demokraci funksionale për qytetarët”, ka thënë Meta.
Gjithashtu ai shprehu bindjen e tij të palëkundur se reforma në drejtësi do të përmbyllet sa më parë.
“Jemi përballë reformës madhore në sistemin e drejtësisë. Reforma në drejtësi do të miratohet, por mbetet ende punë për të bërë. Mbetet ende për të bërë për një demokraci funksionale e jetë më të mirë” deklaroi kryeparlamentari.
Të pranishëm në këtë event kanë qenë ish-kryetarët e Parlamentit ndër vite, si Jozefina Topalli, Kastriot Islami, si dhe figura të hershme të politikës shqiptare.