Mijëra qytetarë të Shkupit me sloganin “Nuk ka drejtësi, nuk ka qetësi”, edhe dje në mbrëmje protestuan për të shprehur revoltën kundër vendimit të presidentit Gjorge Ivanov për faljen e politikanëve si dhe për tërheqjen e vendimit për mbajtjen e zgjedhjeve të parakohshme parlamentare më 5 qershor.
Qytetarët e organizuar nga disa OJQ kërkuan dorëheqjen e presidentit Ivanov si dhe formimin e një qeverie tranzicioni.
Protestuesit thanë se fillimi i procesit për përzgjedhjen e qeverisë së ekspertëve do të përgatisë terrenin për zgjedhje të lira dhe demokratike si dhe do të mundësojë që politikanët dhe pushtetarët të ballafaqohen me drejtësinë për veprat e dyshuara penale.
Protesta filloi me grumbullim para Prokurorisë Speciale Publike në shenjë mbështetjeje për punën e saj dhe vazhduan drejt parlamentit të Maqedonisë për të përfunduar para ndërtesës së qeverisë së Maqedonisë.
Protestat në qytetin e Shkupit filluan të martën e kaluar, kur presidenti Ivanov dekretoi vendimin për faljen e politikanëve, ndërsa nga dita e djeshme, përveç Shkupit, protesta janë zhvilluar edhe në qytete të tjera të vendit.