Kinezët duken të vendosur në ambicien e tyre. Kompania që ka blerë aeroportin ndërkombëtar të Shqipërisë, China Everbright Group, ka sqaruar se përse e ka bërë këtë investim.
Sipas Reuters, blerja më e fundit e kompanisë së mbështetur nga shteti kinez, ka qenë për të nënvizuar ambicien e Kinës për të rindërtuar Rrugën e Mëndafshtë, që ofron lidhje tregtare me Europën dhe Azinë.
Pekini përllogarit se iniciativa e tyre “Një brez- një rrugë”, do t’i shtojë tregtisë kineze 2.5 trilionë dollarë përgjatë dhjetë viteve të ardhshme.
Për këtë arsye, firmat kineze janë duke mbështetur gjithmonë e më shumë investimet agresive në projektet e infrastrukturës jashtë vendit.
Kompania kineze China Everbright thotë se do të marrë përsipër koncesionin e aeroportit të Rinasit deri në vitin 2025.
Në deklaratën e tyre thuhet se numri i pasagjerëve në këtë aeroport ka kërcyer nga 600 mijë në dy milionë brenda dhjetë viteve, duke e bërë atë një nga aeroportet më rritjen më të shpejtë në Europë.
Firma kineze do ketë 75 përqind të sipërmarrjes, kurse pjesën tjetër do e ketë një firmë nga Hong Kongu, e quajtur Friedmann Pacific.
Por çfarë është Friedmann Pacific?
Reuters shkruan se është një firmë investimesh, që menaxhon rreth 1.9 miliardë dollarë.
Dhjetorin e shkuar ata blenë 49.99 përqind të aksioneve në aeroportin Blagnac të Tuluzës në Francë.
Firmat kineze kanë blerë së fundmi edhe 67 përqind të portit të Pireut.