Kuvajti dëboi 40 000 shtetas të huaj gjatë 16 muajve të fundit, kryesisht për qëndrim të paligjshëm në zonën e pasur me naftë të Gjirit, raportoi sot e përditshmja lokale ”Al-Anba”.
Sipas gazetës ”Al-Anba”, e cila citon pa bërë të ditur burimin nga rangu i lartë i shërbimeve sekrete, 26 600 punonjës të huaj, shumica aziatikë, u dëbuan në vitin 2015.
Frekuenca e dëbimeve shënoi rritje gjatë katër muajve të vitit 2016 me kthimin e 14 400 personave drejt vendit të tyre.
”Shumica e të dëbuarve nuk ishin të pajisur me leje qëndrimi ndërsa disa të tjerë u kthyen për shkak të kryerjes së veprave penale, kryesisht për shkelje të kodit rrugor ose krime”, saktësoi e përditshmja.
Kuvajti numëron 1,3 milionë shtetas autoktonë si dhe tre milionë shtetas të huaj që vijnë kryesisht nga India, Pakistani, Bangladeshi, Filipinet ose vendet arabe si Egjipti dhe Siria.