Topi: Berisha mesazh BE e SHBA se ka në dorë “çelësat” e stabilitetit

Deklaratën e ish-kryeministrit Berisha për armatosjen e qytetarëve, Kryetari i Frymës së Re Demokratike, Bamir Topi e sheh si mesazhi që i drejtohet ndërkombëtarëve për t’u treguar se është ai që ka në dorë “çelësat” e stabilitetit të vendit.

“Ky është një mesazh i pastër për ndërkombëtarët. Për t’u vetëservirur si individi që ka në dorë çelësat e stabilitetit në Shqipëri. Për t’i thënë atyre: “shiko çfarë jam në gjendje të bëj, çfarë mesazhi i jap unë natyrisht merr një ndjeshmëri të lartë”. Unë për sa i përket kualitetit të politikës, të asaj që e thith deklaratën në fjalë, mendoj që nuk është një politikë shumë profesionale, sepse në të tilla raste përderisa ka një kuadër ligjor kushtetues, menjëherë politika duhet të dijë ta orientojë në kanalin ligjor. Ose në rast se do futet në rrafshin politik pastaj duhet të ketë një debat profesional politik. Kështu që më duket një deklaratë e cila fokusin e ka te ndërkombëtarët dhe kërkon ta orientojë debatin e brendshëm pikërisht në një aspekt që nuk i intereson askujt”, thotë Topi për Tema Tv.

Ai thekson se deklarata është e rëndë, por jo e pamenduar. Kreu i FRD shton se qëndrimi është i mirëmenduar, pasi Berisha e ripërsëritur atë duke i qëndruar deklaratës së mëparshme.

“Berisha është një politikan i një stazhi të gjatë, sigurisht është një intelektual. Kur do ta thotë, diçka e thotë dhe mos mendoni se atë që thotë e thotë në mënyrë të pamenduar. Madje ai vet e ka rikonfirmuar, se është një deklaratë e tij e menduar mirë, sepse kur jep disa deklarata dhe në distancë kohore nga deklarata e parë, që në shumë raste mund të jetë edhe një lapsus, ti ke të gjithë të drejtën tënde, kohën, për ta ridimensionuar. Por kur i qëndron, i qëndron gjithnjë e më fort, do të thotë se është e mirë-menduar.  Dhe kur flitet për armë, në një vend ku armët kanë bërë gjëmën, përfytyroni se ç’lloj tensioni sjell në kancelaritë perëndimore”, shton Topi.