Kryeministri Edi Rama bën të ditur se thesari i dinastisë së Marubëve do të futet në Muzeun më të ri Kombëtar, në Shkodër .
“Pas shumë vitesh rrugëve të braktisjes në mëshirën e fatit, ky thesar i paçmueshëm jo vetëm i kulturës tonë kombëtare, po i vetë qytetërimit europian, do të konservohet dhe ekspozohet për publikun në kushtet më optimale”, shkruan Rama në facebook.
Duke u ndjerë krenar për këtë kontribut të rëndësishëm të qeverisë në shpëtimin e thesarit të Marubëve, Rama falenderon “atë grusht njerëzish në Shkodër, të cilët me pasionin e dashurisë për kulturën dhe me besnikëri të madhe ndaj punës, në kushtet më të mjera dhe pa asnjë mbështetje, e ruajtën thesarin nga rreziku real i shkatërrimit përfundimtar”. Muzeu Kombëtar Marubi do të çelet në Ditën e Europës.
