Fondit për kompensimin financiar të pronarëve pritet t’i shkojnë më pak para. Ndërhyrja e fundit e qeverisë në ligjin për fondin special për kompensimin e pronave që pritet të shqyrtohet nga ligjvënësit kuvendor parashikon që përqindja e të ardhurave që vijnë nga shitja e pasurive shtetërore të jetë jo më e fiksuar në 65 për qind të të ardhurave por e variueshme nga 20 deri në 65 për qind. Fondi special për kompensimin e pronarëve, përveç të ardhurave nga buxheti i shtetit apo transferimi i pronësisë së parcelës ndërtimore, ka si zë tjetër të ardhurash edhe paratë që merren nga shitja në ankand e pasurive shtetërore. Me ligjin aktual, nëse shitet një pasuri shtetërore, rreth 65 për qind e vlerës shkon si fond për kompensim. Ndërkohë që me vendimin e fundit të miratuar në qeveri bëhet edhe ndryshimi ku përqindja që mund të shkojë në fondin e kompensimit fillon nga 20 për qind në 65 për qind të vlerës së shitjes së objektit, në varësi të shlyerjes që bëhet me lekë. Ky ndryshim vjen në një kohë kur qeveria ka shtyrë afatin e përdorimit të bonove të privatizimit deri në fund të vitit 2014, që do të thotë se privatizimet apo shitjet e pasurive publike mund të bëhet në një masë të caktuar edhe me bono privatizimi.