Rama: Jam i pakënaqur me Reformat se jam i vetëdijshëm për padurimin e njerëzve

Operatori i Sistemit të Transmetimit ka përuruar Qendrën Kombëtare Dispeçer dhe Sistemin e ri të Kontrollit.

I pranishëm në përurim ishte edhe kryeministri Edi Rama, i cili tha se është krenar që “Shqipëria ka një qendër dispeçer të këtyre standardeve”.

“Në rrugën e reformave, po i kthejmë publikut atë çfarë po investojnë. Kemi hyrë në sistemin europian të monitorimit, shkëmbimit të energjisë. Ky sistem i jep fund shpërdorimit të energjisë elektrike”, theksoi Rama.

Madje Rama deklaroi se ai vetë ishte më i pakënaquri me reformat e qeverisë.

“Si Kryeministër i vendit, jam njeriu më i pakënaqur sot. Për arsyen e thjeshtë se jam i vetëdijshëm për padurimin dhe pritshmëritë e njerëzve”, tha Rama.

Gjashtë milionë euro janë investuar për ndërtesën dhe 17 të tjera për ndërtimin e sistemit të monitorimit të nën stacioneve elektrike në të gjithë vendin.

Administratori i OST-së, Engjëll Zeqo tha se “kjo është Qendra Dispeçer ndër më modernet në Europë”

Damian Gjiknuri, ministër i Energjisë, u shpreh se “Shqipëria është e integruar tashmë në rrjetin energjetik europian dhe investitorë të mëdhenj po afrohen falë reformave të mëdha” sipas tij.