Policia e Shkodrës ka vënë në pranga 8 persona, të cilët dyshohet se janë pjesë e një grupi kriminal që shiste armë dhe kryente grabitje të ndryshme.
Operacioni nisi, pasi dy shtetas. E.Gj dhe G.M. 24 dhe 27 vjeç ishin grabitur dhe dhunuar nga pjesëtarët e grupit kriminal një ditë më parë, duke përfunduar në spital.
Nga hetimet rezultoi se shtetasit me iniciale E.GJ i kanë marrë nën kërcënimin e armës në lagjen Guerile, Shkodër (në një zonë të pabanuar) 150.000 lekë të reja dhe një telefon I-Phone nga disa persona të armatosur dhe të maskuar me tre automjete BMW X5, Ford Focus ngjyrë të zezë dhe një autoveturë tjetër.
Policia e Shkodrës menjëherë sa ka marrë njoftim ka organizuar punën duke zhvilluar operacionin policor të koduar “Livadhet”, ku kanë marrë pjesë efektivët e Komisariat të Policisë Shkodër, Specialistët e Sektorit për Hetimin e Krimeve të Rënda, nën drejtimin e Prokurorisë Shkodër, ku si rezultat i operacionit u bë e mundur arrestimi në flagrancë i shtetasve:
-Ardit Torishta, 23 vjeç, banues në Shkodër.
-Bekim Torishta 20 vjeç, banues në Shkodër.
-S.B, 16 vjeç, banues në Shkodër.
-Endri Mustafa, 27 vjeç, banues në Shkodër (I dënuar më parë për plagosje).
Si dhe u bë shpallja në kërkim i shtetasit A. B, 27 vjeç, banues në Shkodër.
Këta persona në bashkëpunim me njëri – tjetrin dyshohen se janë autorë të veprave penale: “ Vjedhje me armë ”, “Plagosje e lehtë me dashje”, “Prodhim dhe mbajtje pa leje të armëve e municioneve luftarake” kryer në bashkëpunim, ndaj shtetasve me iniciale E.Gj dhe G.M.
Në vazhdimësi të kryerjes së veprimeve proceduriale u bë arrestimi në flagrancë i shtetasit Astrit Bilali, 56 vjeç, banues në Shkodër, babai i të shpallurit në kërkim.
Gjithashtu në vazhdimësi të kryerjes së veprimeve proceduriale u bë arrestimi në flagrancë dhe i shtetasit Brahim Bilali, 58 vjeç, banues në Shkodër (xhaxhai i shtetasit të shpallur në kërkim).