Bomba e Berishës: Kam përgjime të Lusë ku pranon të më prenotojë vende në gjyqësor

Në një ditë të tejnxehur nga zhvillimet politike me deklarata e kundër-deklarata, u duk sikur kulmi kishte kaluar. Ambasada amerikane pohoi paradite se PD po pengonte reformën në drejtësi, teksa Rruga e Elbasanit vlerësoi elasticitetin akrobatik të mazhorancës.

Por disa gojë të mira kanë konfirmuar për Gojët e Liga se nga minuta në minutë pritet që ish kryetari i PD-së Sali Berisha të vërtetojë me fakte se ambasadori Donald Lu ishte pro metodës së rezervimit të vendeve për opozitën në drejtimin e organeve të drejtësisë.

Në një status në FB, Berisha shkroi para pak minutash: “Unë kam përgjime që dëshmojnë se z.Lu ka pranuar variantin tonë të reformës, me vende të rezervuara për pakicën. Do m’i prenotosh vërtet?, i thashë. Po ore, pa merak, më tha, sa veta do që të prenotoj. I thashë dy ose tre për çdo organ drejtues të sistemit, me mëngjesin përfshirë”.

Dhe pastaj Berisha kalon në dialekt: “Kjo asht e vërteta e kulluuur, kjo asht rrezja e dillit të s’vërtets, pooo, po mor zotëri… aaa nji sekond, unë ju garantoj jueee”.

Mesazhi vazhdonte me disa shenja të çuditshme, mesa duket sinjal se dikush ishte përpjekur ta shkëpuste Berishën nga laptopi.

Ndërkohë, burime të kulluara që peshkojnë në ujëra të turbullta, pohuan për Gojët e Liga se çuditërisht, shqipja e ambasadorit Lu në regjistrimin e Berishës kishte dialektin lab, dmth, “Po ore, ça thua ore gango, po gradoje trurin në zero ore, po unë i bëj ndere dynjasë e jo më ty ore” etj.

***

Shënim: Gojët e Liga është rubrikë satirike. Ju lutemi, mos komentoni me idenë që skenari i përshkruar këtu ka ndodhur vërtet, por që mund të ndodhë… Nejse, ju e dini vetë.